Protesta dos 32 alcaldes do PP de Lugo ante a Deputación polo "estado de abandono" das estradas

Os 32 alcaldes do Partido Popular na provincia de Lugo concentráronse esta quinmta feira diante do Pazo Provincial de San Marcos, sede da Deputación lucense, para protestar "polo estado lamentábel e de abandono" das estradas provinciais.

Canda eles participou tamén a presidenta dos populares lucenses, Elena Candia; o portavoz adxunto no Senado, José Manuel Barreiro; e o parlamentario autonómico José Manuel Balseiro, entre outros cargos públicos.

Todos eles con máscaras e cascos azuis e vermellos, cores da Deputación de Lugo, participaron nesta concentración onde o rexedor de Friol, José Ángel Santos, exerceu como portavoz . Segundo manifestou, o presidente da Deputación e responsábel de vías e obras, José Tomé, é "coñecido" como "o presidente chafalleiro, sendo o máximo responsábel da situación actual das vías de comunicación en toda a provincia".

"Desde o Partido Popular demandamos un plan de mellora do firme das estradas, un plan coordinado e baseado en criterios obxectivos, técnicos e de necesidade, para cubrir e pór a disposición dos recursos que se contan no parque móbil da deputación e polo a disposición non só nos municipios onde goberna o mesma cor política (polo PSOE), senón a disposición de toda a provincia e de todos os concellos lucenses", reivindicou Santos.

A presidenta do PP de Lugo, Elena Candia, á cabeza desta concentración, sinalou que esta protesta obedece á necesidade de "escenificar" o seu "rexeitamento" ao que entenden "que é unha mala xestión dun presidente da Deputación e desde logo un pésimo delegado de vías e obras".