En Marea denuncia que Galiza volve quedar fóra dos principais investimentos ferroviarios
Asegura que as medidas anunciadas por Fomento non inclúen ningunha das liñas de tren do país que precisan melloras, como as conexións entre Lugo e Ferrol, no tramo Compostela-Ourense ou na liña que une Vigo e Ourense.
Galiza volve quedar fóra dos principais investimentos en materia ferroviaria. Así o vén de denunciar En Marea, despois de darse a coñecer as medidas presentadas por Fomento aprobadas no último consello de ministros. Ningunha das liñas ferroviarias do país que precisan melloras nin recolle as propostas realizadas desde o país.
“O anuncio do goberno central non atallará ningunha das necesidades en materia ferroviaria que ten Galiza”, apuntan en nota de prensa. Entre elas, destacan o axuste de horarios e o incremento de frecuencias no Eixo Atlántico, medidas que foran aprobadas por unanimidade no Parlamento de Galiza tras iniciativa do propio grupo político.
Entre as medidas que non figuran está o axuste de horarios e o incremento de frecuencias no Eixo Atlántico, aprobada polo Parlamento galego.
A medida de Fomento non recolle investimento algún para as conexións entre Lugo e Ferrol, no tramo Compostela-Ourense ou na liña que une Vigo e Ourense. “Esta resolución castiga novamente Galiza fronte ao resto do Estado, que ignora uns investimentos chave para o desenvolvemento social e económico do país. Do conxunto das necesidades, só anota sen detallar a mellora do traxecto Vigo-Tui”, explican desde en Marea.
“Como sucede no caso da AP-9, o goberno central non ten en conta o acordo de todos os grupos da cámara galega, ignorando os acordos da cámara e condenando Galiza a unha situación na que o atraso das infraestruturas ferroviarias é cada vez máis grande”.