Máis dun cento de persoas apoian no Obradoiro a convocatoria do referendo catalán

Máis dun cento de persoas amosaron esta mañá na Praza do Obradoiro o seu apoio á convocatoria dun referendo en Catalunya, medida anunciada onte polo president da Generalitat, Carles Puigdemont, para o vindeiro 1 de outubro. Baixo o lema "Isto vai de democracia", perto dunha vintena de colectivos, asociacións, partidos e sindicatos citáronse na praza para manifestar o respaldo á consulta sobre a relación de Catalunya co Estado ao entenderen que "se trata dun dereito básico da cidadanía como o de poder votar". 

O escritor Suso de Toro foi o encargado de ler un manifesto en catro linguas -galego, castelán, catalán e inglés- no que se asegurou que "non se pode construír un país democrático sometendo os seus cidadáns pola forza" e que o Estado ten a obriga "de protexer os seus cidadáns, non de encerralos". Os asistentes, entre os que se atopaba a eurodeputada do Bloque Nacionalista Galego, Ana Miranda; a deputada galega pola mesma formación, Montse Prado, ou o membro da coordinadora de EnMarea, Mario López Rico, contaron coa presenza da senadora do PDdeCAT, Beth Abad, que asegurou, no momento en que os participantes estaban depositando o seu voto simbólico nunha urna instalada no decurso do acto, que aínda non perde a esperanza de que o Goberno español se sente coa Generalitat para atopar unha solución satisfactoria para as dúas partes.