Junts empraza o PP a negociar con Puigdemont fóra do Estado español se queren unha moción de censura

Junts emprazou esta terza feira o PP para negociar co ex president da Generalitat de Catalunya e líder de Junts, Carles Puigdemont, fóra do Estado español se queren explorar a posibilidade de impulsar unha moción de censura ao Executivo estatal liderado por Pedro Sánchez.

A formación catalá avisou o PP de que agora xa coñecen os mecanismos para ter conversacións coa súa formación, que pasan por falar co seu líder, Carles Puigdemont, co secretario xeral de Junts, Jordi Turull, e coa súa voceira no Congreso, Miriam Nogueras.

Tamén apuntaron que as conversacións deberán ter lugar fóra do Estado español "por razóns sobradamente coñecidas". "Non seremos menos esixentes co PP que co PSOE á hora de aceptar reunións por estes asuntos. A partir de aquí xa dirán", resolveron desde Junts.

Rolda de contactos

Previamente, o presidente do PP, Alberto Núñez Feixoo, encargou ao portavoz popular no Congreso, Miguel Tellado, que chame aos grupos políticos que apoiaron a investidura de Pedro Sánchez para comprobar se están dispostos a apoiar unha moción de censura tras o envío a prisión do 'ex número tres' dos socialistas, Santos Cerdán. 

Así o anunciou Feixoo nunha mensaxe na rede social X, no que lamentou que o "número dous" de Sánchez durmiu "en prisión" e o xefe do Executivo "pretende seguir". "É insostíbel", sentenciou o líder da oposición no Congreso español.

A secretaria xeral do PP, Cuca Gamarra, que nas últimas horas anunciou deixará a secretaría xeral do Partido Popular, insistiu o pasado sábado na negativa do seu partido de presentar unha moción de censura contra  Sánchez pola falta de apoios, aínda que advertiu que "se eses catro votos xurdisen", ese mesmo día rexistrarían a moción para "terminar" co Executivo español.