España, España, España

O pasado venres, día 14 de xullo, a CRTVG celebraba un debate entre catro das e dos candidatos que aspiran a representarnos ás galegas e galegos no Congreso logo das eleccións do 23-X. Era a única oportunidade que tiñamos para ver quen son e escoitar as súas propostas, pero o medio público decidiu facelo ás dez da mañá, en horario de mínima audiencia. As razóns, nunha corporación pública denunciada desde hai anos polo seu propio persoal por manipular a opinión pública e estar ao servizo do Partido Popular, son obvias: evitar que o electorado galego coñeza, non xa as propostas do resto das formacións políticas, senón tamén os propios candidatos e candidatas. Por iso, o esperable era que, ao día seguinte, exactamente igual que ocorrera co debate a dous celebrado en Atresmedia, o resto dos medios de comunicación publicados en Galiza se fixesen eco do papel xogado por cada quen, das propostas presentadas, das críticas feitas por uns e por outros e da forma en que actuaron. Porén, iso non ocorreu, agás, claro, en Nós Diario, que levou esa información á portada. Os mesmos medios que nos informaron até a saturación de cada xesto, de cada mirada, de cantas veces repetiron certas palabras, de quen estivo máis nervioso ou quen gañou, no debate de Atresmedia, consideraron irrelevante informar dun debate celebrado entre as persoas que encabezan as candidaturas en Galiza. Irrelevancia Consideraron irrelevante, pois, cumprir co fin para o que existe o xornalismo, co deber de informar, coa súa función de respectar o dereito das e dos galegos a coñecer como nos van defender unha vez consigan o seu escano, que posición terán fronte ás reformas que se nos veñen enriba, quer laboral ou de pensións; fronte á crecente privatización da sanidade, do ensino e dos servizos públicos en xeral; fronte ao incesante incremento dos prezos dos alimentos; fronte á especulación cos prezos da enerxía; fronte á invasión eólica por terra e por mar para seguir enriquecendo as multinacionais do sector ou fronte á abafante ofensiva do patriarcado. Consideraron irrelevante que o electorado galego soubese quen vai defender máis partidas orzamentarias para favorecer a nosa industria, o noso sector pesqueiro, o noso agro; para favorecer a modernización das nosas infraestruturas ou a construción daquelas imprescindibles para os nosos sectores produtivos; para garantir as mellores condicións de vida para as traballadoras e traballadores e para o conxunto do pobo galego. Estamos, nas mans dunha mediática que día si, día tamén, nos di en que e como temos que pensar E fixérono porque consideran irrelevante a propia Galiza, porque parten da concepción de que o que lles ten que interesar ás galegas e galegos é o que pasa nunha España na que se laminen as linguas e as culturas e na que non cabe un Congreso no que estean representadas as organizacións políticas das nacións que conforman o Estado español. Mais tamén porque na súa aposta está a reconstrución do bipartidismo, aínda que isto supoña agora alimentar o franquismo herdeiro da sanguenta ditadura militar que padecemos durante 36 anos, e, sobre todo, garantir que este modelo capitalista financeiro siga avanzando con recortes de todo tipo á custa do empeoramento das condicións de vida das maiorías sociais. Así se vén materializando nas informacións publicadas no decurso desta campaña electoral e así se fixo evidente o día seguinte dese debate celebrado na CRTVG. Na foto fixa da prensa do sábado, día 15 de xullo, La Voz de Galicia, La Opinión, Faro de Vigo, El Correo Gallego ou Diario de Pontevedra non recollen a máis mínima mención. Atlántico recolle, nunha columna de opinión, unha comparación entre “Debate e debatiño”; Ideal contén unha información dunha columna salientando algúns dos temas tratados no debate e El Progreso unha foto a catro columnas cun pé de foto de oito liñas. E tema liquidado. Fronte a isto, moitos destes xornais si recollen o debate a sete do 13 de xullo na TVE, dándolle máis ou menos relevancia, de novo poñendo o foco en España e minimizando o que ocorre no noso país. A prensa no seu conxunto converte en propio o argumentario do PP respecto do voto por correo e, se nunha páxina informa sobre o seu incremento, ou sobre as colas que está habendo nestes últimos días, na do lado, ou na mesma, as denuncias de Feixó por esta cuestión. No seu afán de converter o nacionalismo en residual e de convencernos de que as únicas alternativas válidas son as de quen se presenta por Madrid, o BNG apenas merece uns breves, agochando ademais, na maioría dos casos, quen o representou no Congreso, Néstor Rego. E xa no colmo, a Opinión nin publica unha soa información electoral da formación política nacionalista. E así estamos, nas mans dunha mediática que día si, día tamén, nos di en que e como temos que pensar simulando información cando, ao igual que denuncia o persoal da CRTVG, o que padecemos é manipulación.