O Congreso aproba a lei para mellorar a calidade de vida das persoas con ELA

O Pleno do Congreso das Deputadas e Deputados aprobou esta quinta feira por unanimidade a proposición de Lei para mellorar a calidade de vida de persoas con Esclerose Lateral Amiotrófica (ELA) e outras enfermidades ou procesos de alta complexidade e curso irreversíbel.

Todos os grupos da cámara votaron a favor desta lei que agora se remite ao Senado para que continúe alí o seu percorrido parlamentario. En concreto, foron 344 as deputadas e os deputados que votaron a favor.

Este texto expón unha serie de cambios lexislativos que están "orientados a garantir a mellor calidade de vida, a través da axilización dos trámites administrativos para o recoñecemento da discapacidade e a dependencia, nunha mellor atención integrada entre os sistemas de coidados sociais e sanitarios, das persoas afectadas". 

Impulso "decisivo"

Desde o BNG, o deputado no Congreso, Néstor Rego, felicitou as asociacións –con especial mención á asociación galega, Agaela– e agradeceu o seu traballo realizado, así como o impulso decisivo que fixeron para que esta lei saíse adiante e sexa unha realidade.

“O BNG mantivo catro emendas que mellorarían a lei mais, en todo caso, non hai ningunha dúbida de que imos aprobar esta lei e farémolo con convicción e entusiasmo” afirmou Rego no Congreso. 

Tamén a Xunta da Galiza aplaudiu a aprobación da 'Lei ELA', aínda que, segundo a conselleira de Política Social, Fabiola García, "chega tarde, con máis de tres anos de atraso, por culpa por culpa do Goberno". Para García, trátase dun "día histórico" que "fai xustiza" coas persoas que sofren ELA e as súas familias.