Compostela prepárase para ser a primeira cidade galega en aplicar unha taxa turística

O Goberno local de Santiago reuniuse esta cuarta feira pola tarde con 208 hostaleiros e hostaleiras da cidade para abordar a aplicación da taxa turística a partir do 1 de agosto. As cuestións técnicas arredor da recadación do tributo xerou incertezas entre algúns dos profesionais do sector, e esta cuarta feira a concelleira de Turismo, Míriam Louzao; o de Facenda, Manuel César; o tesoureiro municipal, Carlos Moure, e técnicos do Concello acordaron nun encontro de máis de tres horas no edificio Cersia de Santiago, concederlle “un tempo” ao sector para informar e actualizar os procesos técnicos e aplicacións precisos para a posta en marcha do cobro desta taxa.

Segundo dixo Míriam Louzao ao remate do encontro, “entendemos” o que formularon os máis de 280 establecementos da REAT convocados á reunión, e “valoramos estabelecer unha data mais acaída que conxugue a entrada en vigor canto antes desta taxa pero dándolle tamén marxe aos establecementos”. Tal e como fixeran xa nas alegacións presentadas na tramitación da ordenanza, o sector pediu que a normativa non entre en vigor ao día seguinte da súa publicación do Boletín Oficial da Provincia (BOP) e reclamaron unha marxe para adaptar os seus rexistros e aplicacións informáticas ao cobro da taxa.

Desde o Concello, os técnicos comprometéronse a “simplificar no posíbel” a entrega de documentación e as autoliquidacións cada seis meses, e estudarán tamén as declaracións responsábeis precisas para as exencións da taxa, con modelos a dispor dos establecementos no portal municipal de transparencia. Lembraron tamén os técnicos que a taxa, cando entre en vigor, afectará a todas as estadías, independentemete da data de reserva das mesmas

A aplicación da taxa na práctica

Logo de lograr que a Xunta da Galiza regulara por lei a finais de 2024 a aplicación desta taxa, o Executivo da alcaldesa Goretti Sanmartín aprobou unha ordenanza municipal para a súa aplicación. Coa entrada en vigor da taxa, Santiago será a primeira cidade galega en aplicala. A taxa gravará con entre 1 e 2,5 euros por día por servizo de aloxamento, con ou sen noitada, segundo o tipo de estabelecemento, e até un máximo de cinco días por estancia. Estarán exentos do abono deste imposto os deportistas federados que se aloxen na cidade por motivos profesionais ou aquelas persoas que o fagan por razóns médicas. Segundo os cálculos do edil de Facenda, Manuel César Vila, 80% da recadación pola taxa estará destinado -vía autoliquidacións semestrais- a investimentos en promoción, impulso, protección, fomento e desenvolvemento do turismo sostíbel.

En toda Europa, e nomeadamente en Portugal, esta taxa turística leva décadas vixente, e son moitos os galegos e as galegas que acoden cada ano a establecementos hostaleiros do país veciño e abonan o imposto nas facturas dos hoteis, especificado e explicado por cada estabelecemento e que oscila dependendo da zona entre os 4 euros de Lisboa e os 2 de Póvoa de Varzim.

A ordenanza

O pleno d Concello aprobou a ordenanza para aplicar a partir do 1 de agosto a taxa. O BNG, Compostela Aberta, o PSdeG e os Non Adscritos aprobárona. O PP abstívose na votación.

Unha recadación millonaria para a capital galega

O Concello de Santiago foi o pioneiro. Segundo as estimacións da Concellaría de Facenda compostelá en canto empece a aplicarse esta taxa recadará ao ano arredor de 3 millóns de euros. A Coruña aprobou en xuño a ordenanza para aplicar tamén unha taxa turística na cidade, unha taxa similar á de Compostela, de entre 1 e 2,5 euros por persoa e noitada -segundo o tipo de establecemento- que está a tramitar o concello para a súa posta en marcha. Son xa varios os concellos que avanzaron a posíbel posta en marcha da taxa. É o caso dos de Bueu e Caldas de Reis, O Grove, A Illa, Portomarín ou Foz e no caso do concello de Sanxenxo o Goberno local “non o desbota”. Vigo podería recadar case 2 millóns de euros ao ano aplicando esta taxa, atendendo ás súas noitadas e prazas hoteleiras. O alcalde, Abel Cabaleiro, non tomou aínda a decisión.