O BNG denuncia ante o Parlamento europeo o proxecto de celulosa de Altri

Ana Miranda mantivo nesta feira diversos encontros cos colectivos afectados polo proxecto de instalación dun celulosa en Palas de Rei, na comarca da Ulloa. A europedeputada nacionalista reuniuse con responsábeis orgánicos e institucionais do BNG nas comarcas de Arzúa, A Ulloa, Deza e Melide así como representantes Plataforma Ulloa Viva, a quen lles adiantou un paquete de iniciativas no Parlamento europeo contra a pasteira.

A eurodeputada nacionalista avanzou unha pregunta diante da Comisión de Peticións para “saber se este proxecto incumpre a normativa europea, porque non podemos consentir que se concedan fondos europeos a un complexo que pon en serio perigo a biodiversidade e o sector agrogandeiro de varias comarcas”.

A represente do BNG lembra que “a construción deste complexo está supeditado á recepción de axudas públicas dos fondos Next Generation, a través dos Perte, que xa foi rexeitado en 2023 da convocatoria do PERTE de descarbonización industrial por incumprir a normativa europea, pero a compañía sigue optando a próximas convocatorias destes fondos de recuperación europeos”.

Avaliación ambiental

“O elevado consumo de enerxía e auga, a posíbel contaminación no río Ulla e na ría de Arousa así como a dependencia da madeira de eucalipto e a perda de biodiversidade, son algúns dos aspectos que deberan ser considerados na avaliación medioambiental en caso de que este proxecto concorra a fondos europeos”, lembra Miranda, en relación coa tramitación do proxecto.

Miranda explica na súa denuncia á Comisión Europea que a falta de ampliación da Rede Natura pode posibilitar a instalacións do proxecto. Neste punto destaca que o espazo onde se proxecta o emprazamento foi incluída na proposta de ampliación da Rede Natura elaborada en 2011 pola Xunta da Galiza.

Rede Natura

A eurodeputada do BNG insiste que “a Rede Natura hai anos debería ter sido ampliada e ao non facelo o Goberno galego do Partido Popular vulnerou as reiteradas advertencias europeas que a Comisión formulou desde 2011 para que a Xunta ampliara este espazo protexido”.

A representante  nacionalista recorda que a superficie incorporada na Galiza á Rede Natura é unha das más baixas do Estado e da Unión Europea. Neste sentido, na Galiza só comprende 11,9 % do territorio, fronte a 27,8% no conxunto estatal.

Miranda acusa á Xunta da Galiza “de usar a ausencia de figuras de protección ambiental para promover proxectos que atentan contra o medio ambiente e incumpren a normativa europea”.