Besteiro asegura que Manuel Fraga "era un verdadeiro demócrata" comparado cos actuais dirixentes de Xunta e o PP

O secretario xeral do PSdeG-PSOE, José Ramón Gómez Besteiro, afirmou esta segunda feira que Manuel Fraga "era un verdadeiro demócrata" comparado cos actuais dirixentes da Xunta e do PP.

Así o manifestou, en resposta a preguntas dos medios sobre a polémica da rúa co nome do fundador do PP, ex ministro e ex presidente da Xunta na localidade de Cariño (Ortegal) onde a pasada sexta feira se aprobou retirar o nome de Fraga do rueiro coa abstención dos concelleiros do Partido Popular.

"Á marxe da autonomía municipal, é verdade que a figura de Fraga está a adquirir gran dimensión ultimamente, porque comparado con quen está agora á fronte da Xunta e do PP, era un verdadeiro demócrata", sinalou o líder dos socialistas galegos.

Besteiro referiuse ao posicionamento de Fraga en materias como o pacto pola lingua galega ou a defensa da Galiza, mentres que "este novo PP, enlazado coa ultradereita, deixa moito que desexar comparado con aquela política de Fraga".

O secretario xeral do PSdeG afirmou que, malia estar nos "antípodas" de Manuel Fraga en cuestións políticas, na súa opinión era "un referente do que tería que ser o PP, e non o é". Así, expresou todo o seu "respecto" pola súa figura, e reiterou tamén o seu respecto pola decisión adoptada no Concello de Cariño, no marco da súa autonomía municipal.