Barómetro completo de EM-Analytics (8 de febreiro): así se reparten os votos e escanos en cada circunscrición

A batalla polo sufraxio das persoas indecisas continúa a ser a principal fronte de loita nesta campaña electoral dos comicios galegos de 18 de febreiro. O barómetro para as eleccións galegas do Instituto Demoscópico EM-Analytics que publica hoxe Nós Diario sitúa en 20% o número de persoas que non teñen decidido aínda o seu sentido de voto. Así as cousas, o futuro do Goberno galego está en mans de perto de 456.000 electores e electoras que aínda non se decantaron por ningunha das opcións políticas en liza, unha cifra que debuxa un escenario totalmente aberto. Até o 12 de febreiro, cada día unha nova entrega do 'tracking' electoral de EM-Analytics.