As alcaldías de máis de 235.000 galegos e galegas penden dun escenario totalmente aberto

O 28 de maio deixou na Galiza 135 maiorías absolutas para o Partido Popular, 58 para o PSdeG, 17 para o BNG e 5 para outras formacións, por exemplo, en Oleiros a Alternativa dos Veciños. Ademais, nunha cincuentena de municipios a suma de actas obtidas polos nacionalistas e os socialistas garanten unha maioría absoluta entre ambas as dúas forzas. Mais existe ao redor dunha quincena de municipios que non só non cadran no mapa no que houbo maiorías, senón que o escenario que teñen actualmente está completamente aberto e non é posíbel saber quen vai acabar levantando o bastón de rexedor ou rexedora o 17 de xuño. Rueda escúdase en que "gañou" o 28-M para non responder sobre a crise ou Baltar Negociacións, contactos, pactos, diálogos e mesmo vetos que se manteñan até ese día de xuño en que se constitúen as corporacións locais van ser determinantes. O exemplo máis coñecido e comentado estes días de concellos con ese escenario é o de Ourense. Mais non é o único. Un dos casos máis sorprendentes é o de Redondela (comarca de Vigo), con case 30.000 habitantes. A lista máis votada foi a do PP, con 10 actas, unha por baixo da maioría absoluta. A socialista e candidata á reelección, Digna Ribas, logrou manter 7 edís, o BNG conseguiu subir de 2 a 3 representantes e a Agrupación de Electores de Redondela (AER) baixou de 3 a 1. PSdeG, BNG e AER suman maioría. Mais esta última, con só 1 acta, ten o futuro da vila na súa man. Manifestou xa publicamente que non votará Ribas —con quen empezaron gobernando o mandato pasado e acabaron rachando o pacto após seren relegados das súas funcións por desavinzas no seo do Executivo—, mais si outra candidata ou candidato do PSdeG ou do BNG. AER afirma que ve "complicadísimo" un Goberno de esquerda. En 2011 e 2015, os edís de AER votaron a súa propia candidatura e iso permitiu un Goberno de Javier Bas (PP). Todo apunta que volverá pór o bastón de mando en mans do PP. O PP perdería a Xunta da Galiza cos resultados das municipais do 28-M Tamén en Ribeira, municipio de perto de 27.000 habitantes da comarca do Barbanza, hai, a estas alturas, un panorama moi aberto con dúas posibilidades: que siga a Alcaldía en mans do PP, e alargar así o dominio popular na localidade desde hai anos, ou un rexedor nacionalista. As urnas outorgaron 10 edís ao PP; 5 ao Partido Barbanza Independente (PBBI), 5 ao BNG e 1 ao PSdeG. A clave está no PBBI, formación impulsada no seu día polo anterior alcalde do PP José Luis Torres Colomer. O seu candidato, Vicente Mariño, sostén que calquera apoio a Ruiz Rivas —rexedor e candidato do PP— e ao seu equipo “sería unha traizón ao noso discurso e votantes”. O PBBI indica que está aberto a negociar co BNG. Os nacionalistas, pola súa parte, acordaron en asemblea iniciar para a semana contactos coas outras formacións de cara a "abrir un tempo novo en Ribeira". En Noia, tamén hai un escenario totalmente aberto, no que a cadeira da Alcaldía pode ser ocupada polo PP, o PSdeG ou outra formación. A chave aquí está en mans dos dous edís de Noieses Independentes, que formaron neste mandato Goberno local co PP após en 2016 darlle a Alcaldía aos populares a través dunha moción contra o PSdeG —co que gobernaban daquela—. Mais agora, após as eleccións do 28-M, din estar dispostos a falar con todos e non se fechan a acordos e pactos de investidura coas formacións de esquerdas e con nacionalistas. O PP ten 7 edís, por 4 do PSdeG, 2 do BNG, 2 da Marea de Noia e 2 dos independentes. En Ponteceso (Bergantiños), cunha nova Corporación saída do 28 de maio e que vai estar formada por 13 edís de seis candidaturas diferentes, todas as miradas recaen sobre os dous edís do Partido Galego, que poden dar a Alcaldía desta localidade de 5.400 habitantes ao PP (4 edís, segunda forza máis votada) ou ao PSdeG (4). O BNG ten 1 acta, as mesmas que ten Adiante por Ponteceso. Finaliza o 28-M, estes son os resultados nas catro Deputacións galegas Nesta lista de concellos con panorama aberto tamén se pode situar Ponteareas, se ben con matices. Aquí o PP tivo 7 actas, 6 o BNG, 4 Alternativa Cidadá de Ponteareas (ACIP) —nada no seu día dunha ruptura na familia popular—, 2 PSdeG, e Independentes por Ponteareas e Ponteareas en Común 1 cada un. ACIP pon estes días como condición para un posíbel acordo co PP encabezar ela mesma o Goberno de Ponteareas. Mais poucos dubidan de que, malia esta ameaza, ACIP acabará dando a Alcaldía á popular Nava Castro. En maior ou menor grao, concellos como A Pobra do Caramiñal, Viveiro ou Sada, entre outros, están pendentes do decorrer das negociacións das que poden saír rexedores e rexedoras de moi diferente cor política. Na Pobra do Caramiñal (9.290 habitantes) todo parece depender da única acta obtida por VIXP, formación de "veciños independentes", que entra por primeira vez na Corporación desta vila barbanzá. Deles depende que na investidura haxa un rexedor de Nós Pobra —nada ao calor das mareas e que o 28-M baixou de 6 a 3 representantes— ou do PP —6 actas—. O BNG ten 2 edís e o PSdeG 1. Barro O último episodio deste tipo de escenarios é Barro, na comarca de Pontevedra, onde o líder de Xuntos por Barro, José Antonio Landín, ex alcalde co PP durante 32 anos, tan só interrompidos pola súa inhabilitación, ofreceu a Alcaldía ao PSdeG. O BNG foi a lista máis votada (5), seguida dos socialistas (3), Xuntos por Barro (2) e o PP (1).