18-F: o PP non ten programa político para as mulleres galegas

Este 18-F terán lugar na Galiza as eleccións máis abertas da última década, os inquéritos electorais indican que hai posibilidades reais de arrebatar ao PP a Xunta da Galiza e é o nacionalismo galego quen está en condicións de liderar a alternativa de goberno. Após 15 anos de goberno e maiorías absolutas, o PP preséntase a estes comicios cun programa que recolle máis de 800 medidas e o relato detallado do que o PP entende por logros do seu mandato malia que na precampaña e campaña o programa político permanece oculto –como o candidato ausente dos debates–. A igualdade aparece na páxina 43 do programa electoral e das máis de 800 propostas que contén apenas 11 fan referencia a este asunto e outras 12 á violencia machista. Comezan resaltando o compromiso coa igualdade de mulleres e homes e o impulso de notables avances por parte do PP, un partido que coa chegada de Núñez Feijóo á Xunta en 2009 tomou como unha das primeiras medidas o desmantelamento do Servizo Galego de Promoción da Igualdade, organismo autónomo adscrito á Secretaría Xeral da Igualdade da Vicepresidencia da Igualdade e do Benestar, argumentando que supuña un "dispendio de cartos". O PP propón incentivar o acceso das mulleres á actividade agraria nun rural que eles mesmos baleiran de servizos Presume o PP na introdución do apartado de igualdade do número de mulleres afiliadas á seguridade social en comparación coa chegada ao Goberno en 2009 e compara a taxa de desemprego das mulleres na Galiza (10,2%) coa media española (13,6%) para sacar peito. Mais a realidade é que a taxa de desemprego das mulleres galegas en decembro de 2023 (10,2%) é a mesma que en decembro de 2008 (10,7%) o que indica que 15 anos de goberno popular non serviron para mellorar esta situación. No apartado de logros o programa fala de compromiso coa igualdade, da aprobación do VIII Plan Estratéxico da Galiza de igualdade entre mulleres e homes e a aprobación da Lei de igualdade efectiva de mulleres e homes en 2023 que actualiza a lei de 2004, unha oportunidade perdida de avanzar na materia pois apenas presenta novidades reais, nun marco legal que apenas sofre modificacións. Fala tamén dos Centros de Información á Muller (CIM), cuxo contido o Goberno do PP decidiu ampliar tamén á atención do colectivo LGBT sen dedicar recursos e persoal adicional detraendo os recursos para a atención das mulleres. Dignidade Outro dos logros mencionados polo PP é a Lei Ángeles Alvariño (de igualdade real entre mulleres e homes no ámbito universitario e de investigación). Esquecen indicar, iso si, que foi o BNG quen impulsou no Parlamento esta lexislación e non os populares. O resto de logros teñen a ver con teleformación, apoio económico aos gabinetes de igualdade das empresas e emprendemento feminino. Faise mención ás políticas de conciliación e corresponsabilidade familiar e novamente cómpre lembrar todos os programas de conciliación que o PP desmantelou tamén coa súa chegada á Xunta en 2009 e que non foron recuperados. Se os logros e as políticas foron escasas nestes 15 anos de goberno popular non son menos escasas as propostas do programa: promesas de reforzo da atención ás mulleres nos CIM cando fixeron todo o contrario, impulso do emprego feminino cando as taxas de desemprego son similares ás de 2009, colaboración co tecido empresarial para o ascenso de mulleres cando o que precisan as mulleres galegas é acceder a empregos dignos e salarios de calidade para abandonar a precariedade e a temporalidade. Propoñen incentivar o acceso das mulleres á actividade agraria nun rural que eles mesmos baleiran de servizos, onde é difícil atopar pediatras e cada vez se pechan máis escolas. Tamén se aposta pola flexibilidade laboral a través do teletraballo e horarios flexíbeis cando a demanda dos colectivos feministas en materia de conciliación pasa por recursos públicos para soster os coidados e que non teñan que ser as mulleres quen piden permisos de coidado, excedencias e todo tipo de reducións de xornada para asumir o que debe ser unha tarefa colectiva. A proposta estrela é a posta en marcha dun programa de atención á saúde menstrual a desenvolver polas matronas de Atención Primaria e os Centros de Orientación Familiar (COF). Mais a realidade é que as políticas de desmantelamento do PP deixaron sen matronas suficientes a atención á saúde sexual e reprodutiva das mulleres galegas e minguados os COF. A proposta que ocupa o último lugar é a creación dun premio á muller emprendedora, algo que sen dúbida contribuirá enormemente a resolver as taxas de desemprego, o incremento da violencia machista, a falta de matronas, a violencia obstétrica que sofren as mulleres no Sergas, a discriminación e o machismo estrutural que existe na Galiza.