Un concello catalán declara El-Rei persoa non grata

O concello de Berga (Barcelona) declarou o Rei Juan Carlos I persoa non grata . No pleno municipal celebrado hai uns días acordouse, tamén, revogar o título de Fillo Adoptivo e a Medalla de Ouro da Cidade que tiña o ditador Francisco Franco. A proposta partiu da Candidatura d’Unitat Popular (CUP) e contou cos votos en contra do PP e coa abstención de CiU e PSC. Nela arguméntase que o Rei “non ten este título como resultado dun proceso democrático (...) senón como consecuencia da herdanza ditada polo seu antecesor Francisco Franco”. Aliás, sinalan que o Rei “lonxe de encabezar un proceso democrático para recompensar os agravios e crimes cometidos pola ditadura fascista do seu mentor, o reinado de Juan Carlos de Borbón caracterizouse pola absolución política e penal dos criminais franquistas”.

Intelectuais e polític@s cataláns pediron ao concello de Barcelona que mude o nome dunha céntrica praza.

Praza da República catalá
Hai uns días, segundo publica o xornal Nació Digital, intelectuais e polític@s cataláns pediron por carta ao concello de Barcelona mudar o nome dunha das céntricas prazas da cidade que agora se chama Joan Carles I. As persoas asinantes, entre elas a decana da Facultade de Economía da UB, Elisenda Paluzié, os escritores Matthew Tree e Víctor Alexandre, ou os políticos Alfred Bosch ou Joan Tardà, remitiron a petición ao actual alcalde da cidade, Xavier Trias. Ademais solicitan a restitución da estatua orixinal da República no seu lugar e que leve o nome de Praza da República catalá.  Este nome, apuntan na carta, é a "máxima expresión de soberanía e democracia que fixo a nosa Nación desde 1714".