Xogo de equilibrios na outra beira do Miño

Un álbum de 2020 que no seu momento pasou desapercibido na Galiza merece, porén, que nos deteñamos nel, e nas causas de que non tivese máis eco no noso país. Implosão / Ricardo Formoso / Porta-Jazz / 2020 / Sete pezas / 15 euros Ricardo Formoso é un trompetista da Coruña que tras graduarse no Conservatorio Profesional de Música da súa cidade natal licenciouse na Escola Superior de Música e Artes do Espetáculo do Porto e, desde aquela, desenvolveu a maior parte da súa carreira en Portugal. Malia que os contactos profesionais entre músicos de jazz da Galiza e da Coruña son razoabelmente fluídos e as colaboracións se dan a un ritmo moderado pero constante, o coñecemento que se ten nesta beira do Miño do excelente traballo que se está a levar a cabo tende a ser exiguo: máis alá de círculos moi especializados, a difusión de toda esa cantidade de músicas que xorden da cooperación entre dous países tan próximos no xeográfico, no cultural e no lingüístico apenas ten resonancia no mundo cultural galego. Implosão contén sete pezas compostas por Formoso e interpretadas polo músico coruñés á fronte dun quitento no que o acompañan o saxofonista canadense Seamus Blake, o pianista catalán Albert Bover, o arxentino Demian Cabaud ao contrabaixo e o portugués Marcos Cavaleiro na batería O álbum mantense no fío que separa o tradicional do contemporáneo, empregando patróns clásicos que os músicos perverten e retorcen en beneficio dunha irreverencia que lle outorga unha alegría sorprendente. O disco comeza co duelo que manteñen a trompeta e o saxo de Blake en "Dimensão", un diálogo que vai in crescendo até que a sección rítmica se apropia do campo de batalla para apazugar as augas. Aí xa se expoñen as armas de cada músico para xogar cos distintos equilibrios que van configurando o álbum: a barafunda rítmica de "Transição", a calma en forma de bolero de "Elementar", os solos vertebradores de "Equilibrio", as escapadas contemporáneas de "Orbital" e "Irreversivel". "Reação" remata o traballo nun resumo que define ben a identidade do quinteto: sección rítmica brillante, piano cristalino e reflexivo, solos de trompeta e saxo vibrantes e profundos. Ricardo Formoso estará presente o vindeiro sábado 4 de febreiro no festival Porta-Jazz (do 3 ao 5 dese mes), no teatro Rivoli do Porto, facendo parte dunha formación que inclúe o pianista Miguel Meirinhos, o contrabaixista João Fragoso, o batería João Cardita, e o saxofonista inglés Joshua Schofield, nunha encomenda do festival que pretende crear interaccións entre novos músicos do circuíto europeo. Unha boa oportunidade para pechar un pouco esa brecha de descoñecemento que aínda nos separa do país veciño.