A voz das mulleres pretas

Compositora, vocalista e multinstrumentista, Ferreira canta desde os 15 anos. O seu debut de estudo chega após unha influínte pegada no eido político e cultural do Brasil cos seus vídeos virais. Así, "Cota não é esmola", con case 9 millóns de visualizacións no vivo da Sofar Curitiba (2017), converteuse xa nun dos himnos de protesta da música brasileira do século XXI. Hibridando a tradición folk con toques de rap, esta canción berra a prol da inclusión social mediante fórmulas educativas autenticamente igualitarias, inexistentes polo momento no país por mor da fonda discriminación racial e heteropatriarcal. Igreja Lesbiteriana, um chamado | Bia Ferreira | 11 pezas, 2019 | 9 euros Desde o esgazado comezo do álbum, no que a sincera voz de Ferreira toca de preto a nosa pel cun calafrío a capela, "Brilha, minha vida" -tal como se estivese a respirar na nosa caluga-, até as reivindicativas das que foran os seus primeiros sinxelos, pasando polos ritmos bailábeis que levantan "a bandeira do amor", Igreja Lesbiteriana, um chamado, constitúe un manifesto contra o feito de manter a boca fechada ante as condicións de opresión, un constante "botar fé" en "mudar a situação". E é que a súa arte -como todas, por outra banda- é política e reivindícase como tal, orgullosa e sen preconceptos. "Sou Frida, sou preta, essa é minha treta / Me deram um palco e eu vou cantar", declara. O título xa dá conta do fondo compromiso que obra que nos dispoñemos a ouvir garda co movemento LGTBIQ+, do que a cantora é unha das máis recoñecidas activistas no Brasil. Así, no tema "Não Precisa Ser Amélia" di: "Cê tem a liberdade pra ser quem você quiser / Seja preta, indígena, trans, nordestina / Não se nasce feminina, torna-se mulher". Con todo, a valente compositora non renuncia ao intimismo de cortes como "Só Você Me Faz Sentir". Porén, a potencia imparábel de Ferreira non fica na gravación. A brasileira ofrece un poderoso directo que atrapa coa súa forza consciente, atravesada pola historia das silenciadas. Ela soa no escenario chegaba para levantar o público, mais desde que actúa con banda os resultados acadan niveis insospeitados. Así o comprobaron as asistentes ao Cantos na Mare, cando os seus versos armados de inconformismo ergueron a praza da Pedreira (Pontevedra). "Fiquei com vontade de pedir a todos os brasileiros para ouvirem Bia Ferreira, depois de tê-la ouvido pessoalmente cantar 'Cota Não É Esmola'. E outras coisas mais", manifestaba o propio Caetano Veloso. Eu non podo máis que sumarme ao chamado do mestre.