Volver á raíz

S e vostede sofre de abatemento, cre que precisa elevar o seu estado de ánimo, ou se simplemente necesita reconectar cunha ilusión esquecida, chegou o momento de escoitar a Eliseo Parra. Cantar y batir é o nome do disco que presentou a finais do ano pasado construído soamente a partir de voces e percusións. Cantar y batir / Eliseo Parra / 2020 / Doce pezas / 12,90 euros Sobran as palabras para falar de Eliseo, un dos folcloristas máis recoñecidos da península e admirado polo seu labor como divulgador de textos tradicionais. Este último disco, Cantar y batir está gravado en pleno confinamento e feito con moita calma. Nel atopamos unha paleta de cores ou de voces en harmonías fermosísimas, feitas polo propio Eliseo. Romances, seguidillas, bailes de Peñaparda… ritmos que nunca antes lle escoitaramos tocar e cantar. Hai que destacar ademais do seu labor como músico e investigador, que Eliseo é un dos poucos que conseguiu gravar na súa extensa traxectoria músicas en todas as linguas da Península Ibérica. Eu propóñovos comezar esta viaxe musical cun dos temas máis intensos do disco "Pena Parda", de case seis minutos de duración, no que se van sucedendo coplas e bailes e ritmos que nos envolven como unha néboa pero cálida. "Pena Parda" é unha magnífica revisión dunha recolleita feita por García Matos no ano 1952 e poderíamos continuar con "Maragato pato", un corrido maragato de orixe tradicional cantado no seu momento por Dolores Geijo, do val de San Lorenzo, unha aldea con son de teares. Pero neste disco, ademais dunha coidada selección de músicas tradicionais, atopamos sorpresas como "Asómate a la ventana", unha xota da provincia de Aragón e que fora cantada por Imperio Argentina nun dos seus filmes en 1935. Outra das sorpresas feita para fechar o disco é unha versión moi persoal do tema de Serrat "Mediterráneo". Poderíamos pensar que este tema está moi versionado xa, pois non, aínda faltaba a fantástica versión de Eliseo Parra, que tan só con voces e percusións consegue construír unha ilusión mediterránea realmente capaz de nos transportar a outro mundo. Por último, e só porque o espazo é limitado e non vos podo falar de todos os cortes do disco, gustaríame destacar "Aksak", a segunda peza de Cantar y batir. Esta palabra parece ser que de orixe turca, significa "coxo". "Aksak" está asociada a un tipo de ritmos que combinan compases binarios e ternarios en amálgama e forma parte da tradición de Castela. Podedes atopar o disco en todas as plataformas dixitais e sobra dicir que é unha auténtica xoia, por iso e por moitas razóns máis, escoitar a Eliseo é voltar á raíz que, cando fai falta, sempre está aí. A raíz, sempre falándonos de como seguir adiante.