As segundas partes poden ser boas e as terceiras tamén

Comezando a escribir sobre este terceiro traballo de Os D'Abaixo acabo de decatarme de que escribín de todos os seus discos. Como non, se non paran de facer cousas bonitas! Somos a pedra / Os d'Abaixo / Edición de autor / 2021 / Once pezas / 15 euros O máis significativo deste terceiro disco é a incorporación do súper acordeonista Santi Cribeiro (Berrogüetto), substituíndo o tamén superacordeonista Xosé Ramón Vázquez (Fía na Roca). O tándem berrogüettil Quim Farinha-Santi Cribeiro nótase. Sempre dixen que para min son como dúas medallistas olímpicas de natación sincronizada. Mais tamén é certo que a estas alturas todos os D'Abaixo empastan á perfección. Cando un grupo chega ao seu terceiro disco soen pasar dúas cousas: que a frescura baixe, que xa farte se non se reinventa... ou que se afiance, continúe coa liña coa que conquistou tímpanos e que eses anos de músicos tocando xuntos se noten positivamente. O caso destes é o segundo, por suposto! As colaboracións son poucas pero moi ben escollidas: Xavi Lozano (saxo barítono e efectos varios), o grande Eliseo Parra (voz e percusións) e, atención, a grandísima María João! Toda unha sorpresa. Unha sorpresa moi agradable. Na miña opinión este terceiro disco diferénciase do segundo principalmente porque en Quixera ser dos paxaros tiñan máis protagonismo as pezas cantadas. Neste Somos a Pedra toman o poder as instrumentais. Por suposto, tamén as hai cantadas, pero as instrumentais destacan máis, e isto non é doado de conseguir. Hai varios temas que me chamaron especialmente a atención: "Valxe", fermosísima muiñeira composta por Víctor Antelo, cuns xiros que namoran. "Muinheira do Verdelhinho", de Quim Farinha. En case 6 minutos de peza instrumental, ten un desenvolvemento interesantísimo e crece de xeito magnífico. "A Croa", tema de Santi Cribeiro e no que case parece que se invoca ao desaparecido Berrogüetto. Foi gravado por Manolo Dourado, con deseño gráfico de Cenlitrosmetrocadrado e o libreto trae un limiar do escritor de novela negra en galego Diego Ameixeiras. Ademais foi gravado ao vivo, algo que non é moi común e que dá bastante frescura ao son final. Gocemos deste Somos a Pedra mentres agardamos o cuarto traballo de Os D'Abaixo! Nom somos nós cascudas negras que nos despachos roubam e medram. Nen tan sequer montes queimados, sujos negócios, favores pagos. Nom somos nós discursos podres dos teus lacaios estafadores. Nem tan sequer as maos doridas que tu desprezas e escravizas.