Máis Baiucas, por favor

En plenas festas de Nadal, está chea de turistas e música por todas partes. En cada pub, un cantautor, unha banda facendo versións ou un grupo tocando música tradicional. Está claro que aquí saben o que funciona. Levan anos demostrando que a música é un ben nacional, que dá emprego e que ademais fomenta a cultura. Misturas EP | Baiuca , 2019 | 7 euros Na Galiza, porén, a pesar de ter capacidade e talento, non somos quen de construír un circuíto musical similar ao que hai aquí. Levamos anos arrastrando unha precaria situación na escena da que non damos saído. Só temos un espellismo dun pasado ‘glorioso’ con bandas internacionais das que hoxe en día só quedan as cinsas. A escena musical apenas se está rexenerando e o público é cada vez menos crítico coa música que escoita en directo. Durante estes días que estiven en Irlanda, e fixen a típica visita de pubs variados, en ningún sitio soaba trap ou reggaetón. Iso xa da que pensar. Para que iso ocorra, é importante que nós como público tamén esixamos calidade. Non debería valer calquera discurso que estea de moda. Parece que todo o que sae nas redes ten credibilidade, ten éxito, e por tanto, asimilamos que tamén ten calidade. Erro. Ese é o principal obxectivo do pensamento consumista, o que din as redes ten que ir a misa. Se realmente queremos unha escena de calidade, é importante que saibamos que moitos xestos pequenos poden conformar un gran cambio, e que se acudimos apoiar as nosas músicas, tamén debemos buscar que haxa un mínimo de autenticidade. Hai un caso especialmente enxeñoso que merece a pena destacar: Baiuca. Aínda estás a tempo de escoitalo. Baiuca representa moi ben o cambio, a rexeneración da escena e o respecto polas nosas músicas. Baiuca foi facendo un oco pouquiño a pouco, e con moito xeito conseguiu unha mestura fermosa do tradicional coa electrónica, enchendo teatros fóra do país. É tan necesario dicir quen somos e recordar de onde vimos. É tan necesario sentir orgullo das nosas músicas. Non por nós mesmas, senón polas que virán despois. En Baiuca atopamos o antigo e o actual e podemos ver e escoitar instrumentistas de calidade. E fala de nós, e leva as nosas música de viaxe e retornan cun aire distinto. Como Baiuca hai tamén outras propostas, pero que seguramente non levarán subvención ou grande apoio mediático, temos que ser nós como público quen apoie estes grupos, só temos que afinar o olfacto e ser críticas. E non falo de nada novo, só estou en Dublín pensando na Galiza.