Fendas

Hai que observar moito. E ter paciencia tamén, porque as cousas pequenas están aí, pero están agochadas baixo daquelas que pesan máis. Pesan máis porque empuxan con forza, porque teñen moitos cartos para expandirse, para coller todo o sitio, toda a nosa atención, todo o noso tempo… Esas cousas grandes queren comelo todo, e que o pouco tempo libre que teñas llo dediques por enteiro a admirar o seu poder. Aínda así, hai fendas. Fendiñas polas que xorden pequenas flores, raíces diminutas, cancións mínimas, melodías que merecen a pena e a alegría. Aquelarre / Mounqup / Molho / 2021 / 9 pezas / 7 euros (dixital) Seguro que o atopaches algunha vez, ese pequeno buraquiño por onde entra un raio de luz, un pé de formiga podería tapalo facilmente, pero aí está, resistindo: o pequeno buraco por onde nacen as músicas alternativas, sen etiquetas, puras e auténticas. Xusto enriba deste buraquiño un cartel di "Apoia o teu artista local". Esta semana quixera falar do traballo dunha artista local incansable, Mounqup, que segue buscando espazo dentro da electrónica do país, contando historias propias con afouteza. Mounqup lanzou o seu terceiro disco Aquelarre, editado por Molho Creación Cultural hai uns meses escasos. Neste disco cheo de referencias á natureza e ao universo feminino, Camille Hedouin, Mounqup, constrúe unha linguaxe divina, experimental, chea de texturas que consegue despois de investigar o son producido por catro elementos, auga, lume, pedra e madeira. Cada un dos nove temas que conforman o disco son unha auténtica sorpresa, unha demostración do talento de Mounqup na expresividade e na lírica, pero sobre todo unha aposta forte por un xeito de mirar a vida. E por esta fendiña de músicas artesanais traio tamén a unha novísima voz mexicana que chegou a min por pura casualidade, Laura Itandehui. Acaba de editar o seu primeiro disco que soa a bolero e a aroma de tardes de sol. Oito cancións que xiran arredor do amor e do desencontro, impecable en canto a arranxos e son. Abre o disco "Yo no necesito de mucho", un tema no que só está a voz de Laura e unhas claves, e asegúrovos que non precisa nada máis. Honesta e sinxela, a voz de Laura Itandehui chega delicadamente para quedar na casa, e ofrece calma e unha elegancia intensa. Todo o disco é unha viaxe cristalina a través de cancións desas como de toda a vida, pero escritas desde un pulso actual. México está exportando ultimamente, pura delicadeza musical, como Silvana Estrada, Natalia Lafourcade, Laura Murcia… Convócovos a unha tarde amorosa, na que despois de chegarmos á casa, poidamos descubrir esas cancións que por pequenas, non están en todas partes, senón que saen timidamente dunha fendiña.