Esposa versionan sen medo ao barullo

Porén, o máis habitual para a maior parte da música é que se adscriba a un xénero xa existente, no caso do primeiro disco de The Manueles, o surf rock. The Manueles / The Manueles / Sweet Grove Records / 2020 / Oito pezas / 6 euros The Manueles é un proxecto que naceu da man do guitarrista de jazz Virxilio da Silva, xunto ao baixista Juansi Santomé e o batería Chus Pazos, co que aseguran procurar repasar o legado que deixou a inspiración do fundador do surf rock Manuel Freitas, na costa Californiana dos últimos 50 anos. Freitas, emigrante de Beluso en California, tería creado o grupo xerme do estilo, The Black Rinchas, sen chegar a gravar nunca un disco. A pesar do seu nulo legado discográfico, consideran que a súa lenda inspirou grupos posteriores como The Shadows, The Ventures, Dick Dale e mesmo o pioneiro da guitarra eléctrica, Link Wray. No seu primeiro disco, de título homónimo, podemos escoitar a guitarra de Virxilio da Silva cun son moi diferente ao que estamos afeitos, cun ton máis sucio e cuberto en reverberación, acompañada por unha produción de corte lo-fi ao longo de oito cancións cun son perfecto para os días de verán. A música deste álbum non busca ser orixinal, se non dar continuidade ao legado de Manuel Freitas, e faino con melodías pegadizas e ritmos bailábeis. "Surf Sumerio", a canción que abre o disco, podería soar perfectamente nunha película de Quentin Tarantino, mentres que outras pistas como "Chamábanlle Miguel A. Granero" parecen saídas dun spaghetti western italiano dos anos 60 grazas ao seu ritmo que mesmo evoca o trote dos cabalos. Noutras cancións do álbum, como "Ramira my Dear", The Manueles apostan nun son máis tranquilo e pausado, mentres que aínda se permiten subir as revolucións unha marcha máis en cortes como "Pearl Ghalpón", cargado con riffs de guitarras máis enérxicos. The Manueles non buscan reinventar nada, todo o que se escoita neste debut encaixa no que xa estamos afeitos a oír nun disco de surf rock. Porén, non por iso é menos desfrutábel. Trátase en boa medida de música feita por un grupo de amigos que o pasan ben tocando xuntos e, cando isto acontece, o resultado acostuma a ser música divertido para o oínte. Ademais, este debut de The Manueles consegue algo moi importante nunha proposta coma esta, manter un son senlleiro en todo momento. Ao homenaxear toda esta música característica das décadas dos anos 60 e 70, a banda galega non realizou unha copia de plástico deste estilo, senón un traballo de surf rock completamente xenuíno.