Agasallo de verán

Recentemente tiven a oportunidade de subir a un escenario a cantar o mítico tema do Xabarín Club "non todo é o que parece". Se sodes da xeración Xabarín, recordaredes que se trata dunha canción divertidísima de Aerolineas Federales que tiña un videoclip tamén xenial, e que remataba co protagonista sentado ao carón dun porco vestido de muller. Daquelas tardes de verán da infancia queda pouco xa, pero aquela música segue máis viva que nunca. Territorio de delirio / Emilia y Pablo / 2021 / Madame Vodevil / Once pezas / 14,25 euros Ás veces penso naquelas músicas do Xabarín e recordo a cantidade de artistas que se sumaron a aquela tolaría. Melodías que falaban do porco bravo, cancións de todos os estilos que agora forman parte inseparábel da memoria emocional de moitas e moitos de nós. Invítovos, se tendes oportunidade, a darlle unha escoita neste verán que comeza a asomar. Pero o verán ten fama de ser unha época na que todo ten menos veracidade, de que todo importa pouco pola súa condición de efémero. Vén ser unha especie de oasis creado socialmente para separar varios períodos de traballo. Aínda que a realidade é que o verán tamén trae cousas insólitas e sinerxías excepcionais. Neste último mes pasou polo país a formidábel luz de Silvana Estrada, unha cantora mexicana da que xa vos teño falado aquí. Silvana acaba de lanzar un adianto do que será o seu próximo disco, Marchita. Unha canción toda melancolía e toda fermosura a partes iguais. Podedes atopala en calquera plataforma de música e tamén vos digo que tivemos a sorte de poder desfrutar en directo da voz de Silvana Estrada aquí na Galiza, xa que estivo cantando no festival 17º da Ribeira Sacra. Desde aquí quero felicitar as organizacións dos festivais do país porque non ten que ser nada fácil asumir todas as medidas e os protocolos Covid e ao mesmo tempo, manter a "maxia". Nesas confluencias insólitas que trae o verán, puidemos ver a Emilia e Pablo que precisamente colaboraron con Silvana Estrada nun dos seus concertos. Emilia e Pablo son dous artistas chilenos residentes en Madrid, que acaban de sacar o seu primeiro traballo, Territorio de delirio. Un disco suave, elegante, de música con raíces andinas pero tamén con pinceladas de auténtico luxo como a colaboración con Niño de Elche. Precisamente "Territorio de delirio-Zona cero" foi o primeiro adianto deste álbum. Un tema moi suspirado cunha guitarra hipnótica, cargado de atmosferas rítmicas e oníricas. Emilia e Pablo ofrecen no seu disco de presentación once temas para ir debullando lentamente, no que aparecen escenarios moi distintos que recordan a México, a Andalucía… unha viaxe de pel, de voces e guitarras. Porque o verán tamén pode traer agasallos magníficos.