Twingo E-Tech, por menos de 20.000 euros

Desde 1992, o Renault Twingo consolidouse como un modelo urbano icónico no mundo do automóbil. Un auténtico éxito con máis de 4,1 millóns de unidades vendidas. Agora, o Twingo E-Tech eléctrico continúa esta historia cunha reinterpretación claramente moderna. Incorpora os fundamentos da primeira xeración, adaptándoos ao contexto actual. Este modelo urbano encarna o compromiso da marca de democratizar os coches eléctricos e facer que a transición sexa accesíbel ao maior número de persoas posíbel. Fabricado en Europa, é un vehículo eléctrico moderno que redefine os estándares do segmento. Mantén a imaxe do Twingo orixinal, cinco portas, asentos traseiros esvarantes e gran versatilidade. O Twingo E-Tech ofrece até 263 km de autonomía WLTP, motor de 60 kW e un prezo inferior a 20.000 euros. Chegará ao mercado a comezos do vindeiro ano. Honda V3R 900 E-Compressor Prototype Honda presentou no Eicma 2025 de Milán a V3R 900 E-Compressor Prototype, unha motocicleta equipada cun motor V3 de 900cc e compresor controlado electronicamente. Desenvolvida baixo o concepto Non-rail Rollercoaster (Montaña rusa libre), combina emoción e confianza, buscando materializar a visión Honda 2030: "Alegría dunha mobilidade libre e divertida". A súa arquitectura V3 a 7º con refrixeración líquida mantén un deseño compacto, pero o compresor xestiona o pulo do propulsor con gran precisión, ofrecendo unha resposta inmediata e un rendemento similar ao dun motor de 1.200cc, con mellor eficiencia ambiental. O carenado loce tapas laterais asimétricas e o novo emblema "Honda Flagship Wing". Este prototipo representa un fito tecnolóxico e emocional na evolución do fabricante xaponés. EBRO S900 PHEV, un gran familiar desde 38.990 euros O EBRO s900 PHEV 4x4 amplía o catálogo da marca tras os modelos s400, s700 e s800, consolidando a súa aposta pola innovación e a sustentabilidade. Con 4,81 metros de longo, 1,92 de ancho e 1,74 de alto, este SUV familiar ofrece unha presenza impoñente na estrada. A súa distancia entre eixos de 2.800 mm asegura un habitáculo espazoso, capaz de albergar até 7 pasaxeiros nunha configuración de 2+3+2. Entre as súas principais innovacións destacan o Head-Up Display avanzado, o sistema de recoñecemento de voz intelixente e unha pantalla central táctil de 15,6" que permite xestionar con facilidade todas as funcións do vehículo: infoentretemento, navegación, conectividade, asistentes á condución, climatización, iluminación ambiental e a cámara de visión HD de 540°. O seu sistema híbrido enchufábel, con tres motores eléctricos e un motor 1.5 TGDI, alcanza 425cv e ofrece até 140 km en modo eléctrico e máis de 1.000 de autonomía, cun consumo medio de 1,68 l/100 km (WLTP). Admite carga rápida de 71 kw (dun 30 ao 80% en de 25 minutos) e carga bidireccional V2L. Fabricado na factoría de Barcelona, destaca pola súa avanzada conectividade, 26 asistentes de condución, dez airbags e un interior premium con pantallas dixitais e un sistema de audio Sony.