Un sábado de homenaxes a Ánxel Casal
Na noite do 18 ao 19 de agosto era asasinado nunha curva de Cacheiras, perto do cemiterio de Teo, o editor e político Ánxel Casal. Este sábado, 19 de agosto, Compostela e Teo acollen actos de homenaxe a quen fora membro das Irmandades da Fala e asinante do manifesto fundacional do nacionalismo galego.
Compostela e Teo homenaxean este sábado Ánxel Casal, quen hai 81 anos era asasinado polos fascistas nunha curva de Cacheiras, perto do cemiterio de Teo. O primeiro dos actos, organizado polo BNG, terá lugar ás 12.30h, na compostelá rúa do Vilar, onde intervirán Argantel Kerdudo, membro de Galiza Nova; Emilio Grandío, historiador; e Rubén Cela, portavoz municipal do Bloque en Compostela. Alba María e a Requinta de Xoán porán a nota musical á xornada.
Á tarde, ás 20h, conmemorarase a figura do editor e político en Teo, nun acto institucional en que tamén se enmarca a ofrenda floral do BNG de Teo ao propio Ánxel Casal e a Pedro da Areosa. Os lugares, a Estivada da Ribeira, en Cacheiras, e o monólito que lembra o membro das Irmandades da Fala. Estarán representados, ademais, os concellos de Santiago de Compostela e da Coruña, con fortes vínculos con Casal.
Traballo editorial
Membro das Irmandades da Fala, Ánxel Casal foi dos asinantes do Manifesto de Lugo, o escrito fundacional do nacionalismo galego e foi un dos impulsores das Escolas de Insiño Galego. Creador da editorial Lar xunto con Leandro Carré Alvarellos e fundador da editorial Nós, o seu gran contributo tivo a ver coa industria cultural, ao impulsar proxectos que tiñan o galego como lingua de comunicación.
Otero, Castelao, Manuel Antonio, Víctor Casas, Ramón Vilar Ponte, Blanco Amor, Cabanillas... foron editados por Ánxel Casal, militante do Partido Galeguista e alcalde de Santiago.
Continúan os actos do Día da Galiza Mártir
Tamén o sábado, os Riazor Blues organizan as Xornadas do Día da Galiza Mártir, cunha palestra de Manuel Monge e de Augusto Ruiz García “Babucho” ás 19.30h na AD O Chicho da Coruña. O domingo, ás 12.30h homenaxearán a “Babucho”.
Por outra banda, o BNG de Oleiros conmemora o Día da Galiza Mártir este domingo ás 19h en San Pedro de Nós, unha homenaxe a Carmen Temprano Salorio “A Moza” e José María Castelo Mosquera “Casteliño”, integrantes da resistencia antifranquista. Intervirá Luís Bará, parlamentar do BNG, e actuarán As Barallocas de Dexo e o cantautor Miro Casabella.