Os 19 de Meirás esixen ao Goberno que inicie a recuperación do pazo antes do 28A
As 19 persoas denunciadas pola familia Franco despois da ocupación simbólica en 2017 do Pazo de Meirás esixen do Goberno do Estado que mova ficha. “Para os galegos e galegas non é menos importante a recuperación do Val dos Caídos, se non máis, recuperarmos Meirás”, declarou aos medios de comunicación o seu portavoz, Néstor Rego.
Os activistas convocaron á prensa para esixir ao Goberno de Pedro Sánchez, que enfronta o tramo final do seu mandato, “o inicio inmediato, antes da convocatoria electoral [o 28 de abril], das accións legais pertinentes para que o Pazo de Meirás deixe de ser propiedade da familia Franco e regrese ao seu lexítimo dono, o pobo galego”. Queren que o Executivo central presente unha demanda polo civil.
Igual que a portavoz nacional do BNG Ana Pontón escribiu unha carta en termos análogos a Pedro Sánchez, os 19 de Meirás -para os que os demandantes piden 13 anos de prisión e unha multa colectiva de medio millón de euros- relacionaron a situación de Meirás coa do Val dos Caídos. “Para a recuperación da memoria histórica de España é importante do punto de vista simbólico a recuperación do Val dos Caídos”, expuxo Rego, “para as galegas e galegos non é menos importante, se non máis, recuperarmos Meirás”.
“Parécenos ben que se actúe dun xeito contundente co Val dos Caídos, pero demandamos o mesmo para o pazo”, engadiu. Dous completos informes técnico xurídicos, encargados pola Deputación da Coruña e mais a Xunta de Galiza, avalan a esixencia. “É de xustiza e é inxustificábel que non se fixera nos últimos meses”, considerou Rubén Cela, outro dos encausados e concelleiro do BNG en Compostela.
O grupo de activistas realizaron unha recollida simbólica de sinaturas na rúa e veñen de abrir unha conta en change.org para recadar apoios. Ademais, expresaron a súa solidariedade co historiador Carlos Babío, coautor de Meirás. Un pazo, un espolio, un caudillo, recentemente denunciado polos Franco debido á súa participación nun programa de televisión sobre o patrimonio da familia do ditador.
Os 19 de Meirás tamén avisaron de que, de non actuar o Goberno con celeridade, porén “en marcha outro tipo de medidas de mobilización social”. “Non nos vai parar nin a familia Franco nin a fundación nin ningún goberno, nin español nin galego, nin do PP nin do PSOE”, advertiu, nas redes sociais, Cela.