103 anos despois, Nebra mantén a lembranza das súas mártires
12 de outubro, un día para render homenaxe ás seis vítimas mortais masacradas en Nebra (Porto do Son) pola Garda Civil en 1916 cando se manifestaban contra un gravame inxusto e abusivo. Este sábado nesta parroquia volverase homenaxear aquelas mulleres.
Era 12 de outubro de 1916 cando un grupo de veciños e veciñas de Nebra (Porto do Son) erguían a súa voz nun protesto na ponte de Cans para botaren abaixo un imposto que lastraba a súa actividade agraria e que fora ordenado polo alcalde para saldar o déficit nas contas de 1915.
Por volta de 300 veciños e veciñas mobilizábanse ese día pacificamente contra o embargo dunha vaca a un veciño polo impago do tributo especial. A Garda Civil disparou indiscriminadamente. Resultaron feridas de bala 32 persoas e faleceron Francisca Carou, Ramona Suárez Pouso, Generosa Cadórniga, Rosa Cadórniga Maneira e Antonio Sobrado Luaces.
O protesto na ponte de Cans non era a primeira mostra de rexeitamento do tributo por parte da veciñanza. De feito, a Liga Agraria de Nebra convocara reunións e concentracións en abril de 1916, unhas mobilizacións que tiveron continuidade até o fatídico 12 de outubro. Ao longo deses meses, todas as peticións dos veciños e veciñas foran desatendidas polo Goberno local.
Actos de homenaxe
103 anos despois, continúan os homenaxes ás vítimas daquela masacre e lembrar a revolta agraria. Haberá ofrenda floral organizada por descendentes daquelas persoas. Ás 10:00, no local veciñal da Comunidade de Montes, exposición "Paco do Martelo no recordo", unha recompilación en fotos e vídeos das distintas homenaxes celebradas estes anos. 18:00, ofrenda floral ao pé do monólito na ponte de Cans. O domingo 13 de outubro, realizarse unha misa na igrexa de Nebra en recordo das vítimas .
O BNG organiza, ás 18:00 horas, unha ofrenda floral no monolito á memoria das vítimas, en Ponte de Cans.