Correlingua leva a festa do galego a once localidades: consulta aquí o programa completo
Correlingua volverá encher Galiza da reclamación festiva do uso do galego en todos os ámbitos, pero especialmente entre o alumnado. O popular evento desenvolverase en once localidades no vindeiro mes de maio e en cada unha delas participarán alumnas e alumnos dos centros da súa contorna. Concertos, festas, regueifas, obradoiros, concursos son o centro dunha actividade que este ano acada a súa vixésimo cuarta edición.
Todas as actividades que converterán o vindeiro maio nunha festa das escolas foron presentadas no Concello de Santiago esta sexta feira, facendo especial fincapé na importancia de traballar coa xente nova para garantir o futuro da lingua desde a festa e a celebración. Na presentación participaron representantes das entidades organizadoras: Goretti Sanmartín, alcaldesa de Santiago; Anxo Terán, presidente da AC Correlingua; Celia Armas, secretaria da Mesa pola Normalización Linguística; Xerardo Rodríguez Roca, da AS-PG, e Suso Bermello, secretario nacional da CIG-Ensino. Entre as entidades colaboradoras figuran as deputacións da Coruña, Lugo, Ourense e Pontevedra, e os concellos da Coruña, Lugo, Ourense, Pontevedra, Ferrol e Vigo, ademais do de Santiago.
Goretti Sanmartín, alcaldesa de Santiago, explicou na presentación de Correlingua a importancia de eventos que chamen pola xuventude e pola rapazada para reivindicar o uso do galego, e que o fagan de maneira "festiva, sen prexuízos e desfrutando de todo o que ten que ofrecer o noso idioma e a nosa cultura".
Os representantes das tres entidades organizadoras, CIG-Ensino, A Mesa pola Normalización Lingüística e a AS-PG, sinalaron a importancia dunha cita que pronto acadará un cuarto de século reivindicando de xeito festivo o dereito ao uso da lingua propia entre as xeracións máis novas. Unha festa na que está implicada toda a comunidade educativa e a as localidades nas que se celebra.
Para Suso Bermello, "Correlingua é moito máis que unha carreira, é unha festa e tamén é unha reivindicación do dereito das persoas a vivir no seu idioma". O secretario nacional da CIG-Ensino sinalou que en 2000, cando comezou a celebrarse Correlingua "a situación do galego no ensino e na sociedade era dun devalo claro". Bermello recapitulou a situación da lingua desde entón, salientando por unha banda o esforzo para todas as institucións que facilitan a súa celebración, pero chama a atención que a institución que ten todas as competencias, a Consellería de Educación, non participe".
Celia Armas, vicepresidenta da Mesa, explicou as dimensións do Correlingua para este ano, apuntou as datas de celebración das festas que decorrerán o mes de maio engandido que "todas as iniciativas que promove o Correlingua nos centros supoñen na práctica que o "Correlingua estea en marcha todo o ano escolar". Tamén salientou o feito de que Correlingua cumpra 24 anos o que a convirte "nunha das principais referencias na defensa da lingua".
E o presidente da asociación Correlingua, Anxo Terán, sinalou a importancia de todas as actividades que o evento realiza nos centros, os obradoiros os concursos, os encontros con autoras, actividades que mobilizan aos centros e que tamén mobilizan sectores da cultura do país como o musical.
Terán deu tamén a coñecer os gañadores da convocatoria do Correlingua deste ano que, en total, distinguiu cinco cancións de outras tantas formacións: A Gramola Gominola coa canción ‘Superlingua’, Cuarta Xusta coa canción ‘Presumo de galego’, Mekánika Rolling Band coa canción ‘Miña nai’, Paco Nogueiras coa canción ‘Festa!’ e Pauliña con ‘Pauliña sen faser nada’. Estas bandas e solistas serán as encargadas de animar as festas nas once localidades que este ano visitará o Correlingua.
Calendario de carreiras e festas do Correlingua
- Sexta feira, 3 de maio - A Coruña, ao pé da Torre de Hércules
- Segunda, 6 - Narón, no Auditorio Municipal
- Terza, 7 - Bueu, na Praza de Massó
- Cuarta, 8 - Lugo, na Praza de Sta María
- Cuarta, 15 - Ourense, no Auditorio e na Praza Maior
- Segunda, 20 - Compostela, na Alameda
- Terza, 21 - A Estrada, na Praza da Feira
- Quinta, 23 - Vigo, no Parque de Castrelos
- Sexta, 24 - Monforte, na Praza dos Condes
- Segunda, 27 - Pontevedra, na Alameda
- Cuarta, 29 - Burela, na Praza da Mariña
Outras actividades do Correlingua 2024
Tamén se desenvolverán outras actividadades como 'Regueifando!' e 'Desata a lingua' así como o concurso libre de creación artística en galego 'Crealingua' e o concurso de música 'Cantalingua'. Toda a información está dispoñible na web correlingua.gal.