A Xunta responde con grallas unha pregunta sobre vulneración de dereitos lingüísticos

A Xunta de Galiza respostou unha pregunta formulada polo grupo parlamentar do BNG cun escrito que contén varias grallas e palabras en español. Bieito Lobeira quixo coñecer as causas da exclusión da lingua galega na facturación ás persoas usuarias e o emprego de toponimia deturpada nas estacións de servizo que a petroleira Repsol ten na Galiza.

O Goberno galego informou de que contactou coa empresa para comprobar os feitos denunciados pol@s nacionalistas, e de que puxo á disposición da multinacional os servizos de asesoramento lingüístico. Servizos que non parecen ter consultado el@s propias, á vista das grallas que aparecen no documento que informa das xestións realizadas, desde formas pronominais mal colocadas, á acentuación do complemento directo e termos en español.

Así mesmo, a Xunta sinalou tamén que instou a empresa a, alén de asegurar o respecto polas formas toponímicas da Galiza, adoptaren "a posibilidade" de usar a lingua oficial que empreguen os e as cidadás nas comunicacións con Repsol, lembrando "a oportuna expresión de cortesía co cliente".