Vivencias e devezos

Non é unha aposta mellor nin peor que outras xa desaparecidas, e por sorte, cada vez temos máis exemplos de contidos feitos na nosa lingua e comprometidos co seu futuro e coa nosa realidade (Olaxonmario, Nubes Baixo Ti, Aquel-e ou Concienciadas). Mesmo así, é unha enorme sorpresa atopar un título como o desta noveliña de Xoán Babarro, aínda que, como veremos, o punto de partida non acabe de ter o protagonismo que se agarda del na súa trama. Teño oito anos e quero ser youtuber | Xoán Babarro | Galaxia | 2019 |156 páxinas | 11,70 euros Teño oito anos e quero ser youtuber permítenos asomarnos á vida de Antón a través dun exercicio escolar. E o pacto ficcional obriga a que este texto sexa corrixido pola súa mestra, Lorena Sancristovo, que tamén aparece mencionada varias veces. Esta revisión xustificaría atoparmos un discurso coma este, limpo das grallas propias dunha crianza desa idade, pero que conserva un estilo infantil ben traballado e que supón sen dúbida un dos grandes méritos de Babarro. "Non me deixan" (ser youtuber) case resolve a cuestión xa no primeiro capítulo. O que segue é unha perspectiva deliciosa da vida de Antón, dos xogos coa súa familia, da súa irmá Sonia, dos seus animais, e de Viladonda, a aldea dos seus avós, parte importante da súa historia. Estamos ante un relato que evoca outras visións clásicas da infancia e que ten varias virtudes: a narración de anécdotas divertidas e o importante papel dunha oralidade que trata de ser levada ao texto con bastante éxito, entre rimas, cantigas e malentendidos. Porén, a pesar do seu sedutor título, e mesmo de incluír o logo da plataforma de Google nas primeiras páxinas, é un libro con pouca marca das infancias contemporáneas. Hai que destacar que, rompendo tendencias ben palpábeis na literatura infantil e xuvenil (non só a galega), non existe na obra un xuízo negativo dos devezos de Antón e da súa relación con internet. Non hai unha lectura opositiva entre a tecnoloxía supostamente deshumanizadora e os vellos valores da aldea, máis ben ao contrario. A cuestión dos eólicos que ocupan un dos montes, por exemplo, aparece cos seus pros e contras, nunha perspectiva que foxe do superficial. Porén, é do pouco que toca a cuestión, e iso sendo xenerosos. Antón quere ser youtuber, pero de ser youtuber vai falar entre moi pouquiño e nada.