"Vémonos no pantano"

Ángela Curro é unha autora formada nas aulas da Escola Antonio Faílde de Ourense, un centro que xa leva dado un bo número de artistas da banda deseñada, e tamén, nas aulas da Facultade de Belas Artes de Pontevedra. Para a súa primeira obra longa, Ángela escolleu o xénero da ciencia ficción, que non é un dos máis habituais do noso cómic fóra do circuíto dos fanzines. Baixo o pantano / Ángela Curro / Demo Editorial / 2022 / 64 páxs. / 14,90 euros A historia deste Baixo o pantano comeza nun futuro onde as viaxes no tempo son posíbeis, así, calquera que poida pagalo pode trasladarse atrás no tempo. Sonia, a rapaza protagonista, decide volver ao ano 2020 na busca de respostas para as preguntas que non deixa de facerse sobre a súa avoa e a súa familia. Sonia chega a unha vila que celebra unha festa histórica –que lembra moito o Arde Lucus– onde terá que procurar a información que precisa. Con esta premisa, a autora constrúe unha historia de intriga na que mete os recursos propios do xénero, tensión e suspense, aventuras e personaxes no límite. Ángela xoga ben cos recursos que ten e consegue a través da ciencia ficción tocar o histórico e mesturalo co misterio. No estilo gráfico podemos atopar influencias da liña clara clásica e do manga, unha curiosa mestura que funciona ben e que fai desta parte un apartado solvente da narración e tamén moi agradábel no visual cunha lucida paleta de cor. O guión xa é outro conto, se ben a premisa é atractiva e promete unha boa dose de intrigas, a materialización da historia é demasiado artificiosa e vai perdendo forza a medida que avanza, cun ritmo final pouco harmonioso co resto da obra. Tal vez esta historia precisaba de máis páxinas pois dá a sensación de que a resolución é apresurada, con tramas algo naif e que deberían estar algo máis traballadas. Aínda así, non é un mal comezo, tanto a parte formal como a historia apuntan cousas ben interesantes para o futuro. Unha obra con moitas virtudes no campo gráfico que, por desgraza, non resolve tan ben a parte literaria mais que apunta a unha autora que pode darnos, nun futuro, obras ben interesantes. No apartado da edición, máis outra vez hai que salientar o esforzo de Demo editorial por ampliar e abrir a banda deseñada galega a autoras –e temos constancia de que hai máis obras en preparación–, algo que sen dúbida lle achega valor artístico e equilibrio a un sector que, historicamente e non sempre por cuestións cualitativas, sempre mirou máis para a beira masculina.