"… Tan boa non será"

M is, si, era. A principios do século XX unha coruñesa chamada Irene González Basanta (1909-1928) foi a que se pode considerar a primeira futbolista do estado semi-profesional cando se converteu en capitá e gardaredes do equipo de fútbol que ela mesma fundara e o que lle daba nome, o Irene FC. Irene lideraba un equipo de rapaces que xogou en varios torneos por toda a provincia e xuntaba centos de persoas nos seus partidos. Polo que se sabe, era unha boa xogadora, difícil de bater e que ordenaba ben a súa defensa, tamén foi pioneira en ser quen tiraba os penaltis, a pesar da súa posición no campo. A Universidade da Coruña (UDC) publica esta banda deseñada que leva por título Irene, a porteira, que con guión de Óscar Losada e debuxo de Xulia Pisón conta a interesante historia desta muller pioneira non só no deporte senón tamén no que hoxe entraría na categoría do empoderamento. O traballo resulta nunha banda deseñada doada de ler e entretida, aínda que curta de máis. O guión é puramente biográfico, moi lineal, máis descritivo que narrativo e funciona máis como estrutura que mantén a obra en pé que como narración, a escaseza de páxinas é a que obriga a este guión directo e sen espazo para tecer tramas e subtramas, isto xoga na contra e non permite que se afonde nos personaxes, no humano e no social, o que sen dúbida sería ben acaido e interesante. Aínda así, nestes tempos escuros nos que agroman as verdes cicutas que empezoñan co seu veleno de mentiras e violencia a convivencia e o progreso, é un cómic entretido e, por riba de todo, moi recomendábel para lectores novos, sobre todo para a franxa preadolescente. Neste último século avanzamos o suficiente como para que xa exista unha liga profesional feminina, e pode que aínda quede moito, certo, mais o que non podemos permitir é volver atrás, a tempos peores. Nunca. A edición é correcta e de prezo xusto para esta iniciativa ben interesante da institución académica coruñesa que difunde a historia desta pioneira, inxustamente pouco reivindicada como tantas outras, que foi protagonista dunha circunstancia única na súa época. Xa para rematar, penso que este podería ser o xermolo dunha obra máis longa, unha novela gráfica que debulle máis polo miúdo aspectos que axudarían a poñer en contexto a importancia do personaxe, así que animo a guionista e debuxante a que o fagan real.