Unha parella inesperada

O 2020 da peste deixábanos, como unha dupla sorpresa, a continuación daquel universo en forma, máis que de segunda parte, de ampliación. Tamén a descuberta do rostro do seu primeiro autor, Óscar Senra Gómez, coñecido como tradutor e agora por un dos debuts máis orixinais da literatura galega dos últimos anos. Sete dias com Elisa / Óscar Senra Gómez / Através / 2020 / 177 páxinas / 12 euros Sete dias com Elisa é, antes que nada, unha visión suxestiva e esforzada na actualización dos tópicos sobre a sociedade galega, moi especialmente dos ambientes que gardan aínda unha fonda conexión co rural. Elisa e Amalia, as súas protagonistas, son dúas señoras entradas en anos que parecen improbábeis protagonistas dunha sorte de road movie que inclúe roubos e intrusións varias, ademais dalgunha fuxida e varias situacións de tensión. Como se Thelma e Louise criasen pitas na periferia rural dunha cidade galega e tivesen tamén todo un contexto particular ao que enfrontarse desde unha complicidade mútua tramada moitas veces con aquilo que non se di explicitamente e tameń con recursos puntuais a outra vida posíbel. Se a sombra do rural galego tende a debuxarse coas liñas da traxedia, nas que a saudade polo seu esmorecemento imparábel ten un protagonismo pouco discutido, hai que agradecer perspectivas como as de Óscar Senra por ofrecer unha visión que non é a idealizada nin a que remite sen alternativas ao pasado. Retos como a presenza dunha inmigración precarizada, que na novela aparece representada por un grupo de rapaces de Ghana, ou a perspectiva da violencia de xénero, que sofre unha das protagonistas, forman parte dunha realidade que segue a tolerar mal a superposición do filtro do mito. Si aflora, porén, a presenza das mesmas vellas opresións baixo novas formas, xunto coa posibilidade da resistencia. Da mesma forma, unha certa ollada irónica moi cedida á interacción dos personaxes e as súas decisións, máis que ao propio narrador, redondean un punto de vista que destaca principalmente pola súa orixinalidade. Dixie Fredberg e algunhas das súas cuestións volven aparecer tamén nesta trama, sen que iso faga obrigatorio coñecer o volume previo, o máis importante de Sete dias com Elisa é, xunto con esa forza do protagonismo feminino, a forza dunha ollada diferente e inesperada.