"Non Serviam"

Nós seis é a primeira obra de BD da coruñesa Julia Lago e con ela gañou a décimo sexta edición do Premio Castelao de Banda Deseñada que convoca cada ano a Deputación da Coruña. O libro conta a historia de Merche, unha rapaza de Ferrol que na posguerra é internada nun colexio de monxas en Valladolid. A vida dentro do convento-escola era dura e estaba moi vixiada mais a pesar do control das monxas Merche é quen de formar un grupo de amigas co que facer comunidade para eludir o control, a soidade e a rixidez dun entorno opresivo e, non poucas veces, represivo. Nós seis / Julia Lago / Deputación da Coruña / 2021 / 50 páxs. / 7 euros A rebeldía de Merche e as súas amigas está debullada por Julia con bo pulso narrativo, asistimos tanto a escenas da vida cotiá das internas como a pensamentos da protagonista. A autora é quen de transmitir a represión que asfixiaba os anceios de liberdade dunhas cativas adolescentes. Un ambiente ultra-relixioso que obedecía sen asomo de dúbida á locución beneditina Ora et Labora. Merche é, na realidade, a avoa de Julia e os feitos que conta no libro son reais. Julia desenvolve nesta obra un estilo sinxelo, cun branco e negro nu de ornamento e case esquemático que non desmerece para nada a narración, mesmo semella que axiliza a lectura e serve para desdramatizar o relato. O estilo gráfico tan directo e accesíbel no trazo está, non obstante, moi ben abrigado por unha composición e distribución das páxinas realmente excelente que combina retículas uniformes de seis viñetas por páxina con grandes debuxos a toda páxina e, mesmo, un xogo co límite e os marcos da viñeta que nos deixa ás claras a madurez narrativa e compositiva desta autora. Tamén é moi destacábel a capa, un debuxo impresionante cunha capacidade simbólica brutal. Unha capa realmente fermosa e que cumpre con solvencia o seu cometido, chamar a atención. O xurado destacou no fallo que a decisión foi tomada por unanimidade e que estimou o estilo directo e sinxelo de Julia mais tamén que a obra: "é unha reflexión sobre a represión durante a ditadura que supón un exercicio moi necesario de memoria histórica, baseado nunha historia real". O concurso convocado pola Deputación da Coruña é aínda o mellor dotado economicamente e o máis prestixioso do país, a pesar dalgunha decisión peculiar no pasado. Unha iniciativa ben interesante e necesaria para a nosa BD, tan orfa de apoio institucional.