A literatura galega en clave de humor

As persoas que falamos de literatura ás veces pecamos de serias, case coma se estivésemos nun funeral. Dámoslle moita importancia a escribir libros, a lelos, a pensalos, sen caer na conta de que poucas cousas hai serias na vida. E a pesar diso, lemos sempre. Chego a esta conclusión despois de ler A gran novela galega, unha obra na que César Cequeliños, crítico literario e editor, analiza a literatura galega dende o humor, unha proposta moi esmendrellante que interesa sobre todo ás persoas que nos dedicamos aos oficios relacionados cos libros. Despois dunha grande experiencia como crítico literario en medios como o Faro de Vigo ou a revista dixital Biosbardia, e como editor en Aira, César Lorenzo, ou 'Cequeliños' como é coñecido en Twitter, escribe unha novela crítica co sistema literario galego, con como se constrúen os premios, o labor dos xurados, a crítica e discutida imparcialidade, o papel dos medios de comunicación e mais o poder político. O que podería ser unha novela seria e de queixa convértese, por sorte, nunha ocasión perfecta para construír un argumento coa risa como elemento principal. A gran novela galega é unha novela retranqueira, na que o autor fai unha análise perfecta do que é o mundo dos libros no noso país, e da debilidade do sistema mesmo, no que pululan premios e máis premios sen que realmente se acabe de asentar o lectorado nin se incremente o mesmo. De todo este presente e futuro desalentadores, Cequeliños fai uso do humor e o resultado é unha obra que se le coma unha farsa, e na que tamén se propón o interesante xogo de tentar adiviñar se o que se conta é real ou se se sitúa no terreo da ficción, e tamén indagar a quen pertencen as múltiples anécdotas que aquí se atribúen a nomes ficticios. Creo que é moi complexo facer rir a través das palabras escritas, mais César Cequeliños conségueo nesta primeira novela, editada por Morgante, na que ademais se desvela como un coñecedor en profundidade do sistema editorial (cultural) galego, das súas eivas e dos retos que as galegas e galegos temos como sociedade. Ademais da metaliteratura, o autor nado en Cequeliños, Arbo (comarca da Paradanta) despega un estilo moi rico, cun galego moi fermoso e coidado, que é unha característica que cada vez máis cómpre reivindicar.