Heroes da diversidade

Aínda que os galardóns con orientación ideolóxica sempre foron vistos cun aquel de sospeita, o certo é que poucas veces resultou máis axeitada a suxestión dun tema para un premio de literatura. Plan de rescate / Antía Yáñez / il. Xiana Teimoy / Xerais / 2020 / 176 páxinas / 12,70 euros papel / 5,99 euros epub En primeiro lugar, porque a perspectiva infantil e xuvenil conservará sempre unha relación formativa co seu público. Non fai falta aprender para desfrutar dun bo libro, pero de todos os bos libros aprendemos, e as sociedades que len acaban por cimentar unha boa parte do seu carácter futuro nas lecturas e o ocio que destinaron ás súas crianzas. En segundo lugar, polo destacado do seu padriño, Agustín Fernández Paz, un autor sensíbel, capaz de adiantar moitas das inquietudes sociais que hoxe experimentamos na súa obra para o público máis novo. Plan de rescate adscríbese a esa lista de obras gañadoras que comezaron cun punto de partida que ten a súa propia complexidade. Pódese escribir sobre a igualdade sen caer no panfletario ou, peor aínda, no evidente? Antía Yáñez sae bastante ben parada do reto con esta pequena novela. O alumnado que se reúne nas clases de apoio do colexio d’O Hórreo descobre que as instalacións foron asaltadas por dous encapuchados con escopetas. Sen un adulto ao cargo, deciden elaborar un plan que permita liberar o centro dos seus secuestradores. Non é unha tarefa fácil, e menos para un grupo de alumnos caracterizados por trazos que parecerían catalogalos entre os menos axeitados para xogar o papel de heroes. Desde a propia narradora, que vai en cadeira de rodas, até personaxes que parecen falar no seu propio idioma. Porén, é esa mesma situación de tensión e a necesidade de colaborar entre todos para solucionala a que fai aflorar tamén as súas habilidades concretas, ademais de ensinarlles a importancia da acción colectiva e o respecto mutuo. Unha peza na que destaca a sobresaínte caracterización das personaxes, que traslada ao texto a maneira de falar de cada un dos membros do grupo, sempre desde o relato en primeira persoa da extrovertida e divertida Noela, firmemente convencida de que teñen que vencer os secuestradores que tomaron o colexio. O peso dun discurso sobre a igualdade pode chegar a ser excesivo por momentos, por iso é importante transmitilo de forma desdramatizada e, a poder ser, divertida. É un obxectivo que cumpre de sobras Plan de rescate, capaz de sacar sorrisos e pode que algo máis ao seu lectorado.