O galego está aí fóra

Trátase só do primeiro elemento dunha galeguidade recentemente separada do reino de Portugal e que os novos colonos van espallar polo territorio deixando unha pegada que chega aos nosos días. E aínda que ben é certo, como tamén se menciona no libro, que o que comeza é un nada romántico proceso de invasión e colonización, non falta quen teña sinalado que a Galiza, que na altura sofre o seu propio proceso de sometemento, debería ser un interlocutor privilexiado e consciente da realidade resultante. Portugués do Brasil. O galego tropical | Diego Bernal Rico | Através | 2020 | 124 páxinas | 12 euros O caso é que moi escasamente o noso país funcionou nesa clave. Se xa o achegamento lingüístico e cultural a Portugal é obxecto das máis airadas polémicas, o Brasil continúa a ser un país afastado de máis para a maior parte da galeguidade. E iso a pesar de que o seu papel de potencia cultural debería deixarnos moitos elementos a ser aproveitados e podería auxiliar a cubrir algunhas das carencias sociais do galego. O papel deste ensaio é precisamente o de funcionar como un elo de conexión, algo que axude a dar a coñecer a realidade brasileira apostando por unha visión próxima, pero que tamén renuncia a grandes idealismos. Non podería ser doutra forma desde a óptica de Diego Bernal, que traballou durante anos en varias universidades do país tropical e fai gala dunha perspectiva máis de lingüista apaixonado que de ideólogo. Entender a innegábel conexión histórica das linguas da Galiza, Portugal e Brasil e todo o valor que tería a súa potenciación non pode levarnos a negar que teñen características ben diferentes, como acontece con outras linguas espalladas por varios continentes. E á descrición gozosa destas diferenzas, acompañada do rastreo das marcas da galeguidade polo Brasil, é que se dedica a maior parte do ensaio. Unha perspectiva na que non faltan tamén mencións ás linguas indíxenas e á súa pegada no país, así como a outras curiosidades lingüísticas traídas polas persoas migrantes de distintas procedencias. Unha aposta chea de referencias culturais e recomendacións musicais e fílmicas que sen dúbida nos axudará a comprender mellor ese "outro" descoñecido, ese parente afastado que hoxe representa a principal forza que fai da nosa lingua unha das máis faladas no mundo e que lle dá a soñada capacidade de enfrontar con orgullo o imperialismo uniformizador doutros.