Para entrar na fantasía épica

A que coñecemos como fantasía épica ten unha dupla interpretación para o público galego. Dunha parte, resulta difícil deslindala da literatura de posguerra e dos camiños trazados por autores como Álvaro Cunqueiro, ou Xosé Luís Méndez Ferrín. Da outra, hai unha tendencia que fixo deste xénero un dos preferidos polo público infantil e xuvenil, especialmente durante os anos oitenta e noventa, aínda que nunha tendencia con profundas raíces previas e afoutadas persistencias posteriores. A proposta que nos achega Contos Estraños parece encaixar máis ben nesa última liña, e por iso destaca na colección "A miña primeira novela de...". A caída de Guiomar / Alba Rozas / Contos Estraños / 2021 / 132 páxinas / 12 euros Os que enchen esta colección son xéneros populares, entendidos nun sentido amplo e entre os que esta referencia fantástica de ecos medievais ten un papel importante e inaugural. Non podería ser doutra maneira cando falamos de Alba Rozas, unha autora pouco coñecida na creación literaria pero cunha dimensión académica relacionada con este mesmo ámbito que converte esta primeira novela nunha peza ben interesante. Desta forma, non resultaría xusto agardar da autora unha vulneración vangardista das fronteiras do xénero, pero si que é coherente pensar nunha certa innovación. E nese sentido, non vemos os nosos anhelos defraudados. A caída de Guiomar toma ao pé da letra o rótulo de "fantasía épica galega" que acompaña a súa capa para construír unha historia que, sen deixar de evocarnos os mundos que autores como Tolkien fixeron posíbeis, tamén lanza unha aposta inesperada cara á propia tradición mítica galega. Referencias aos seres fantásticos da nosa cultura, así como aos instrumentos da música popular galega, fan desta peza narrativa algo especial e a medio camiño entre as ansias dun público novo e o peso dunha tradición cultural que non deberamos deixar de lado. Aima é unha nena da raza da xente cativa que ve como os seus pais son levados polo cabalo da fiaña. Soa e desamparada, dá con Tegra, unha guerreira que, ademais de comprometerse a axudala a recuperar a súa familia, está involucrada nunha tarefa moito máis transcendente que implica todo o futuro do reino de Eabaca. Máis alá do desenvolvemento clásico da trama, o retrato da solidariedade feminina, a aposta pola unión das distintas culturas do reino e o valor da amizade e a valentía acaban por dar unha dimensión especial a unha historia que nos mergulla nun xénero que tantas veces foi deixado de lado, mesmo despois de construír mundos que son para quedar neles.