Cen anos

A banda que acompaña este novo ensaio de Xulio Ríos subtitula a obra como “Unha historia do Partido Comunista Chinés”. Como o propio autor apunta, a ligazón do partido coa China chega a representar en moitos momentos unha práctica identidade. Esta historia asume, por tanto, un punto de partida complexo e representa un verdadeiro reto. A metamorfose do comunismo na China / Xulio Ríos / Faktoría K / 2021 / 432 páxinas / 18 euros O Partido foi fundado en 1921 en Wuhan, cidade que hoxe moitas persoas coñecen pola súa ligazón coa pandemia mundial. É un século no que atopamos unha guerra civil de máis de vinte anos, unha guerra mundial, a fundación da República Popular (1949), o seu papel na Guerra Fría e a loita por abandonar un estadio de subdesenvolvemento e subalternidade no escenario mundial. E non só: non pode deixarse de lado dentro deste proceso a peculiar forma que o comunismo chinés adopta, a súa puxanza económica nun mundo globalizado ou as problemáticas concretas que territorios como Taiwán, Hong Kong Macau, o Tibet ou Xinjiang trouxeron nos últimos anos. Tampouco os desafíos que conxunturas como os conflitos tecnolóxicos e as pandemias da actualidade recente viñeron representar. Material, sen dúbida, para unha obra de varios volumes, na que tratar aspectos tan difíciles como os diferentes liderados, en ocasións responsábeis de iniciativas enormemente polémicas e con cambios de rumbo que sorprenden especialmente á mentalidade occidental. Xulio Ríos destacou nos últimos anos como un dos grandes expertos na realidade de China, á que ten dedicado varias obras, tanto en galego como para o mercado castelán. Probabelmente sexa tamén unha das poucas persoas capaces de responder a este reto de partida esquivando os riscos de concibir unha obra xigantesca ou filtrada por unha ollada excesivamente concreta á hora de ler os diferentes procesos políticos da nación asiática. A metamorfose do comunismo na China ten algo máis de catrocentas páxinas pero nelas realízase unha meritoria síntese histórica. Tamén un intento por entender (e facer entender) as peculiaridades e contradicións do comunismo chinés, un camiño específico que está levando ao comunismo chinés á hexemonía global e ao que, sen renunciar a certas críticas, cabe responsabilizar do fito de modernizar un país que partía dun subdesenvolvemento notábel. Cun estilo predominantemente descritivo, pero sen esquivar datos económicos ou temas espiñentos, Xulio Ríos ofrécenos unha ferramenta accesíbel para achegarnos a unha realidade cada vez máis presente no escenario internacional.