Das cousas que trae o mar

Andar ás crebas é un deses oficios en desaparición que, porén, garda dentro de si unha enorme potencialidade literaria. Buscar entre as cousas que trae o mar ás praias terá sempre unha dimensión romántica que xa foi empregada por outros autores da nosa contorna. É unha actividade que nos fala de moitas cousas que podemos comparar coas nosas vidas: agardando pola fortuna, camiñando entre o azar ou reconstituíndo as mil historias de cada obxecto que chega a nós. E aínda que todo ese engado do universo crebeiro ten unha dimensión que encaixa moi ben cos intereses das persoas novas, sempre interesadas en atopar cousas e buscarlles historias, o certo é que non abundan as obras que o aborden. A crebeira Marabillas é un libro escrito e ilustrado por Olaia Sendón, que non é a primeira vez que dedica o seu traballo no ámbito da creación audiovisual a esta figura. A perspectiva de ofrecerlles unha historia ilustrada ás crianzas si que é unha novidade, e nese sentido entendemos que cumpre dous papeis importantes. O primeiro é o de dar a coñecer á xente máis nova unha actividade en declive pero moi vinculada á identidade das zonas costeiras. A segunda, poder explotar esa dimensión da marabilla que só un contexto como as crebas pode ofrecer. Desta maneira Olaia Sendón trénzanos unha historia que se apoia moi ben nun traballo de ilustración no que as cores van ser moi importantes. Marabillas, de roupa e cabelo azul pero cunha bota laranxa (xa que para ese pé nunca as atopou azuis na praia) ensínanos o seu oficio e unha colección das cousas que atopou nas súas incursións. A protagonista non ten problema en reaproveitar a maior parte deses obxectos atopados, algúns ben estraños e inverosímiles, outros cunha historia aberta, como a mensaxe nunha botella, que se nos deixa apuntada sen explicitar. Hai un día, porén, no que se decata de que o obxecto atopado, un colgante cun gravado e unha imaxe, ten que supor unha enorme perde sentimental para quen o perdeu. Marabillas trata de devolvelo e comeza unha pequena aventura de pescudas que nos leva a pensar nese camiño de mar que sempre uniu Galiza con Irlanda, pero que tamén nos deixa entrever como habitamos un mundo diverso, cheo de persoas con diferenzas que pode estar unidas polo mesmo nome ou oficio, mesmo sendo completamente contrapostas. Unha historia fermosa e chea de convites a deixar voar a imaxinación que pode dar a coñecer ao público novo a importancia e a marabilla dunha ocupación como esta.