"Contan as antigas lendas…"

Esta é unha banda deseñada que afonda –e atopa– na nosa tradición oral para tecer unha historia de aventuras na que unha rapaza nova, a guerreira Aloia, é a encargada de facerlle fronte ao Urco. E non só, tamén andan por ese bosque o nubeiro e un demo tardo, todas criaturas mitolóxicas de noso. De partida xa é un acerto, temos patrimonio abondo ao que acudir. Unha dúbida fóra de mapa, o Hellboy de Mignola será un demo tardo? David Lorenzo é máis coñecido na banda deseñada pola súa labor nos entintados de ACO (pseudónimo de Alejandro Cal Oliveira, debuxante vigués) mais aquí descúbrese como autor completo para asinar o guión e o debuxo. Este é un cómic dirixido a público preadolescente, a xente moza que xa deixou atrás tutelas e libros de grandes ilustracións mais que aínda está buscando camiños no cómic. Ten o atractivo de estar ambientado na nosa terra e na nosa tradición, é evidente que Aloia fai referencia a un castro, así que xa saben, esta é unha historia de celtas. Pode, por tanto, ser un bo punto de partida para interesar á xente moza na nosa historia e cultura que, como diría aquel, a globalización ten under attack. A protagonista é Aloia, aquí o autor tira do estereotipo de rapaza afouta, que afronta o destino que lle é anunciado polo druída da aldea e que asume ese camiño heroico, por moi tráxico que este sexa. Por tanto esta sería unha historia arquetípica da viaxe da heroína, en palabras de Propp. De certo, para que experimentar coa estrutura cando sabes que algo funciona, unha decisión autoral intelixente, poñer os esforzos na arte e na historia. Non inventa nada pero resolve ben o asunto narrativo. O guión non é complexo, ten unha historia lineal moi axeitada para lectores e lectoras novos, vai directo ao que interesa e fai diso virtude. Aloia ten que afrontar unha serie de obstáculos até chegar ao momento decisivo onde saca o mellor de si para resolver o problema. O debuxo é sinxelo mais moi efectivo, ponse ao servizo da historia e resolve ben cunha evidente economía de recursos. A influencia do manga é evidente, algo que xa está no imaxinario común, as personaxes teñen un estilo do gusto oriental, de ollos grandes e formas redondeadas, e unha épica que non se pode obviar en cada viñeta. Na literatura infantil e xuvenil, se é que podemos meter a banda deseñada na literatura, están de moda as personaxes femininas que fan gala de fortaleza e decisión para afrontar os retos, algo que debe contribuír, aínda que sexa con modestia, a derrubar os muros do heteropatriarcado estrutural. Boa falla farán heroínas para construírmos un futuro mellor.