A cona contra o patriarcado

A BD é un medio (comparativamente) pouco usado aínda para cousas diferentes do formato clásico, xa saben, o usual libro que nos debulla unha (ou varias) tramas como se fose unha novela (gráfica). Mais si, hai outros camiños para explorar, como o ensaio, un xénero que cada vez está máis presente e que busca novas canles afastadas do tradicional. Podemos ver xa videoensaios ou mesmo BD-ensaio. A froita do coñecemento é un exemplo paradigmático deste último. Liv Strömquist é unha autora sueca, feminista que a través desta obra aborda dun xeito moi creativo a manipulación, mesmo a negación, dos corpos e nomeadamente de todo o relacionado co órgano sexual feminino. De que xeito o patriarcado foi modificando as percepcións e convencións culturais até hoxe, cunha sociedade androcéntrica e falocéntrica e como desde esas posicións, que si, son políticas, construíuse unha serie de estruturas de pensamento que parten do masculino para explicar o feminino. Non sei se isto lles lembra aquilo da costela de Adán? A min, evidentemente, si. A muller como complemento, como simple mecanismo de reproducción, como forma imperfecta de masculinidade. Strömquist pon o ollo na historia dos xenitais femininos dun xeito gráfico e didáctico mais tamén divertido. Manexa ben a retranca e aínda que a parte gráfica non é o que máis destacaremos do libro, tampouco o desmerece. Bebe do underground, de debuxos bastos e pouco traballados, do punk, onde o importante é máis a ética que a estética, o contido que a forma. Nun percorrido desde a Grecia clásica até a actualidade, a autora debulla séculos de negación e represión sexual cunha documentación excelente que serve para evidenciar como se construíu unha imaxe distorsionada que tivo efectos terríbeis na sexualidade e na liberdade das mulleres. Tamén nas masculinidades. Non é preciso explicar canto troglodita nos arrodea, de feito hai cincuenta no Congreso dos e das Deputadas, e como aínda temos que saír a reivindicar, non poucas veces, que as queremos vivas e libres. Finalmente, hai que recoñecer o traballo de tradución e adaptación, que non debeu ser doado polo formato dos textos, e tamén o da editora Catroventos que desde o cooperativismo vén a enriquecer o catálogo de obra en galego. Un libro moi recomendábel para todas e todos mais sobre todo para nós, para os homes, que aínda temos demasiadas cousas que aprender e que reivindicar solidariamente para chegamos á plena igualdade.