Brais e Chisco, os mellores do barrio

Santy Gutiérrez é un dos autores máis senlleiros da Nosa BD. Con máis de vinte anos de profesión é un auténtico todo terreo que o mesmo fai humor gráfico para unha tira diaria, que cómic, ilustración ou imparte obradoiros. Desta volta publica con Demo editorial: Brais e Chisco. Extremo risco. Unha banda deseñada para rapaces e rapazas que anden polos anos de adolescencia temperá. Esta obra, no estilístico, bebe directamente da máis recoñecíbel tradición do cómic francobelga para conectar coa Escola de Marcinelle, esa outra vía do cómic complementaria á coñecida liña clara que influíu definitivamente na mítica revista Spirou e que tiraba, habitualmente, de recursos como a caricatura, a exaxeración, os personaxes antropomorfos ou fantásticos, os narices grandes, os globos moi redondeados e dunha moi característica impresión de movemento. Brais e Chisco son dous amigos, un ieti e un pingüín, que adoran os deportes de risco e que están continuamente meténdose en leas, situacións de perigo e malentendidos por mor da súa inconsciencia e, tamén, inocencia. Ambos os personaxes forman un dúo cómico que funciona ben e que dan en moitas situacións hilarantes. O guión recorre a equívocos, golpes, esaxeracións e en cada páxina hai unha brincadeira en historias autoconclusivas. É un guión divertido que se apoia moito na tradición do humor físico ou slapstick, a comedia de golpes, persecucións e ritmo frenético. Resumindo historias moi canallas, máis dirixidas a adolescentes que a infantes, mais que, de seguro, farán as delicias da cativada. O debuxo é simplemente excelente, moi axeitado para este tipo de historietas, cun trazo firme e definido e unha paleta de cores moi ben escollida que redondea esta obra dunha gran calidade técnica e narrativa. De feito, ben podería ser unha daquelas historietas da antes mencionada revista belga Spirou, xa que logo, ademais do elevado nivel gráfico respecta os seus códigos visuais e narrativos. Aliás, o libro trae como extra unhas páxinas finais con pasatempos que lle darán vida á obra máis alá da lectura, unha boa escolla para unha tarde de sábado antes do comezo do curso. Hai que destacar tamén que a edición é excelente, nesta colección Demo pequeno que a editorial inaugurou co magnífico Os Escachapedras de Marilar Alexandre e Fran Bueno, está coidando especialmente a factura do libro: tapa dura, cor, papel de calidade e prezos contidos (dentro do posíbel). Termos unha colección de banda deseñada en galego que atenda estas faixas de idade é primordial se queremos que as xeracións máis novas lean agora e no futuro. Tamén é unha excelente ferramenta para continuar a afianzar a nosa lingua como vehículo da cultura popular sen complexos.