"Benvidos a Villa Flugante"

As aventuras de Passer P. Malta de Andrés Magán é a obra gañadora do XV Premio Castelao de Banda deseñada da Deputación da Coruña na categoría de infantil e xuvenil. Aínda que o fallo do premio foi a finais do ano 2020 é agora cando se publica. As aventuras de Passer P. Malta / Andrés Magán / Deputación da Coruña / 2021 / 64 páxinas / 12,50 euros Andrés Magán é un dos autores máis importantes na banda deseñada galega de vangarda. É artista gráfico e músico, e, para xúbilo de Don Abel, vigués. Tamén fai parte dos nomes máis recoñecidos da xeración Fosfatina, un grupo de autores e autoras que publican regularmente coa pequena editora viguesa e que seguen os camiños do cómic máis experimental. Unha xeración que non deixa de asombrar a críticos e divulgadores que abrazan con entusiasmo a capacidade de innovación e de ruptura co cómic maioritario, de explorar novos xeitos de facer BD. Esta é a primeira incursión de Magán no campo do cómic infantil e xuvenil. Faino cunha obra divertida e preñada de imaxinación, que camiña a carón do surrealismo, tanto no apartado gráfico como na parte literaria. A historia está protagonizada por unha serie de animais antropomorfos e, concretamente, polo ser que dá nome ao libro, Passer P. Malta. Passer é un carteiro que decide dar un cambio á súa vida e comezar a buscar outra ocupación, no ínterim pasa por unha serie de aventuras delirantes e metanarrativas. Certamente, Andrés Magán demostra unha gran capacidade para soñar un mundo paralelo e unha boa habilidade para tecer un guión coherente nese mundo imaxinario que, por momentos, semella até psicotrópico. Graficamente, Magán afástase do seu lado máis experimental e escolle unha narración convencional cunha retícula de 6x6 -con algunha lixeira variación– e unha división por capítulos. É moi destacábel a súa pureza nas liñas e un estilo que encaixa co canónico da liña clara, o Tintín de Hergé. Liñas ben definidas e cores planas e ben contrastadas. Narración sinxela e moi limpa, o que, sen dúbida facilita a comprensión a públicos máis cativos e non aburre aos máis xuvenís. O equilibrio acadado por Magán entre unha historia fantástica e o xeito de contala, máis convencional, é espectacular e faina funcionar coma un reloxo. Sen dúbida unha obra ben interesante e cunha edición coidada e de calidade –e o que non é menos importante, a un prezo moi axeitado– que fará gozar á rapazada e que estimulará a súa imaxinación.