Auga e futuro

Paraxes complexas, con todo, nas que ás veces resulta máis complicado lidar con certas etiquetas e prexuízos. É un dos riscos que corre esta Be Water, primeira obra de narrativa publicada pola editora debutante Cuarto de Inverno, na que pode que esta aposta por orientar a publicación cara ao lectorado máis novo chegue a afastala doutros públicos potenciais que tamén poderían achegarse a ela. Be Water | Antía Yáñez | Cuarto de Inverno, 2019 | 13,50 euros | 120 páxinas A proposta de Be Water está encadrada en moitos elementos que soan a pedagoxía, esa ladeira sinuosa pola que acostuman arrolar algunhas das mellores ideas orientadas á xente moza. O ecoloxismo, coa consciencia sobre os recursos ameazados como a auga creando un fondo constante, ou a perspectiva de xénero da protagonista e a súa maternidade sobrevida, por exemplo, son temas nos que é doado acabar creando narrativas tópicas e adoutrinantes. Un dos logros de Antía Yáñez é precisamente tocar todos eses temas sen facelo, apostando sempre pola intelixencia das persoas que len e ofrecéndolles perspectivas pouco habituais e, nalgúns casos, até disruptivas, como presentar un abuso sexual baseado no poder cuxa vítima é un varón, ou a visión da maternidade en condicións extremas que ten a protagonista. Da mesma forma, hai que destacar o éxito co que a autora constrúe un universo tan arriscado como o da distopía. O mundo de Be Water é un escenario postapocalíptico no que o ser humano se refuxiou baixo terra e vive nunha sociedade altamente xerarquizada que xira arredor da escaseza da auga non contaminada. Este tipo de construcións literarias acostuman ser tratadas cunha perspectiva de vale tudo que as leva a inverosímiles moi difíciles de sortear para o público máis exixente. Non é este o caso da novela, que todo o máis chega a tensionar levemente o pacto ficcional, conseguindo envolver pouco a pouco o lectorado nunha trama que parte do problema individual á dimensión colectiva e que remata dun xeito aberto, case chamando por unha continuación. Be Water é unha novela recomendábel que sumar á xa longa nómina de distopías galegas. Se cadra ese é un dos seus puntos febles, pois non custa moito relacionala con outras achegas recentes, ou non tanto, ao xénero, ao que porén ofrece unha serie de novidades interesantes que xustifican a súa lectura.