Álbums con cromos novos

Os álbums de heroínas constituíron un dos éxitos editoriais máis inesperados dos últimos anos. Nacen da idea de facer visíbeis para as nenas e rapazas modelos de éxito social e profesional que sirvan como incentivo para tramar un futuro propio. Estamos, pois, ante unha lectura feminista construída desde o optimismo: moito máis aló de destacar as dificultades e frustracións que algunhas destas profesionais atoparon ou a súa mesma falta de visibilidade, decídese priorizar o seu valor como referentes para as novas xeracións. Á sombra desta idea, apareceron varios libros no mercado anglófono, algúns deles protagonizando as súas propias polémicas, como a de que tipo de mulleres de éxito merecen ser consideradas un modelo para as persoas novas. No noso contexto, non hai moito que Anaír Rodríguez lanzou, da man de Xerais, os volumes Pioneiras (2018) e Pioneiras 2 (2019) coa coda "Galegas que abriron camiño", unha iniciativa similar aplicada ao noso ámbito. Galegas na ciencia / Isabel Blanco (il. María Lapido) / Belagua / 2021 / 48 páxinas / 17 euros Unha mostra de saúde dun conxunto editorial é que esta idea non parase por aí e que sexa agora a editorial Belagua a que nos ofrece este Galegas na ciencia, unha perspectiva moito máis concreta e que apunta a un dos campos específicos nos que a sociedade patriarcal despregou o seu poder sobre as mulleres. O mundo das profesións científicas continúa a ser dos que menos vocacións femininas atraen, algo que, en boa medida, está relacionado tamén con esa falta de referentes de éxito. Saber que non só existen, senón que moitas delas desenvolveron a súa vida e carreiras na mesma xeografía que as nenas e rapazas de hoxe habitan é unha forma de nutrir dous ánimos diferentes. A diferenza doutras propostas, o libro de Isabel Blanco acolle varias decisións importantes. A primeira, a de considerar que a "galeguidade" é algo que non se cinxe ao lugar de nacemento, senón a unha asociación complexa co territorio e coa cultura. Ángela Ruíz Robles, autora daquel primeiro libro tecnolóxico, puido nacer nunha vila de León, pero botou toda a vida vinculada a Ferrol. Que dicir das irmáns De la Vega, nacidas nun territorio que só non é galego no xurídico-administrativo e ás que se privou moitas veces desa pertenza. A segunda escolla é a de incluír autoras vivas. De Isabel Zendal (nacida en 1771) a Teresa Miras Portugal (en 1948) hai marxe para que unhas poucas desas investigadoras aínda gocen de boa saúde e poidan seguir alumeando un futuro menos cheo de pedras e cambadelas ás persoas máis novas.