Zelenski, cercado pola corrupción, chega a Madrid en busca de fondos para continuar a guerra

Volodimir Zelenski chegou onte a Madrid procedente de París co obxectivo de lograr un incremento da axuda militar do Goberno español. Se na súa anterior visita ao Estado en 2024 conseguiu fondos do Executivo de Sánchez por unha contía de 1.000 millóns de euros, onte o mandatario ucraíno reclamou do seu homólogo español máis apoio para mellorar a capacidade operativa das súas forzas armadas. Neste sentido, manifestou que "as prioridades máis importantes son os sistemas de defensa área e os mísiles". O dirixente ucraíno comezou a xornada no Congreso dos Deputados, onde foi recibido pola súa presidenta, Francina Armengol, e polo seu homólogo no Senado, Pedro Rollán. A continuación, mantivo un encontro co rei Felipe VI no Palacio da Zarzuela, onde participaron representantes do Goberno español e do ucraíno, rematando os encontros da mañá cun xantar ofrecido polo monarca. O calendario de Zelenski proseguiu cunha reunión con directivos da industria militar e co presidente Pedro Sánchez. Sánchez comprometeu a entrega de 615 millóns de euros a Ucraína no vindeiro ano para a compra de material militar. Ao tempo, destinará outros 200 millóns de euros para outras actuacións de mellora das infraestruturas civís. A visita de Zelenski ao Estado español coincide co seu momento político máis complicado desde o comezo da guerra de Ucraína con Rusia en febreiro de 2022. A pasada semana, a Xustiza ucraína anunciaba unha operación contra unha trama de corrupción a grande escala no sector enerxético ucraíno, ordenando o rexistro das oficinas de Energoatom, a empresa estatal da enerxía atómica. A investigación buscaba aclarar o desvío e branqueo de 100 millóns de dólares procedentes da axuda estadounidense e comunitaria por parte de responsábeis desa compañía. A mocidade abandona masivamente Ucraína fuxindo do recrutamento forzoso ordenado por Zelenski A Oficina Nacional Anticorrupción de Ucraína (NABU), cuxas competencias tenta limitar Zelenski desde hai meses, e a Fiscalía Especializada Anticorrupción (SAPO) alertaban da existencia dunha "organización criminal", que se apoderara, "en total, de perto de 100 millóns de dólares" e "levaba un estrito control dos fondos recibidos, realizaba contabilidade en negro e organizaba o branqueo de capitais mediante unha rede de empresas non residentes". Unha parte importante das operacións, en particular a emisión de efectivo, "facíase desde fóra de Ucraína". O operativo corrupto afecta directamente o círculo persoal e político de Zelenski. Neste sentido, a investigación da Fiscalía Especializada Anticorrupción desvela que a trama de corrupción foi ideada por Timur Mindich, un vello amigo e compañeiro de negocios do presidente ucraíno que fuxiu do país cando se destapou o caso. Mindich é copropietario da produtora audiovisual Kvartal 95, fundada a comezos do ano 2000 por Volodimir Zelenski cando era actor de cinema e de televisión. O caso de Energoatom O relatorio Fiscalía Especializada Anticorrupción sobre Mindich e Zelenski é demoledor. No mesmo sinálase que "Mindich exercía o control sobre a acumulación, distribución e legalización do diñeiro obtido por medios delituosos no sector enerxético de Ucraína" e asegura que "utilizou as súas relacións amigábeis co presidente de Ucraína" para levar adiante as súas actividades ilegais. Ante o aluvión de críticas, Zelenski limitouse a sinalar que desde que comezou a investigación non mantivo ningún contacto co seu socio no sector do audiovisual. O caso de corrupción en Energoatom salpica, tamén, varios membros do Executivo ucraíno. Neste sentido, a Fiscalía ucraína apunta nas súas investigacións que o ministro de Xustiza, German Galushchenko, obtivo "beneficios persoais" da trama corrupta cando foi titular de Enerxía do Goberno de Zelenski entre 2021 e 2025. Na mesma liña, avanza conexións co operativo da actual responsábel de Enerxía, Svitlana Grynchuk, se ben mantén baixo segredo a parte do procedemento que a afecta, o que impide coñecer con precisión a súa vinculación coa trama. Zelenski anuncia unha nova lei para intentar frear as manifestacións na súa contra Galushchenko e Grynchuk foron xa obrigados a abandonar o Goberno ucraíno. A este respecto, Zelenski acusounos de "socavar o Estado e infrinxir a lei", asegurou que "agora mesmo a situación é extremadamente difícil para todos en Ucraína e é absolutamente inaceptábel que, no medio de todo isto, haxa tamén tramas no sector enerxético". Neste punto, demandou aos responsábeis públicos "máxima integridade", manifestou comprender o "malestar do pobo ucraíno" con estes casos de corrupción e comprometeuse "a limpar a xestión" de Energoatom. Ucraína está considerado como un dos Estados máis corruptos do mundo. Así, por exemplo, o Índice de Percepción da Corrupción 2022 de Transparencia Internacional, o último publicado, situábao como o segundo país máis corrupto do continente europeo. Mais a situación ten empeorado desde o comezo do conflito bélico, como consecuencia da chegada de importantes remesas de fondos procedentes dos diversos Estados da OTAN que apoian Ucraína na súa guerra contra Rusia. O dilema político do presidente ucraíno Os continuados casos de corrupción que salpican o Goberno de Zelenski desde o comezo da súa guerra con Rusia están a provocar unha importante desafección contra o réxime entre a poboación ucraína. Neste sentido, os niveis de popularidade do mandatario están nos seu niveis máis baixos desde febreiro de 2022, apuntando unha enquisa do mes de setembro do oficialista Instituto Internacional de Socioloxía Kíiv que o seu nivel de aprobación se sitúa en 58%, sete puntos menos que no mes de xuño. O decurso da guerra, con Rusia avanzando en todas as frontes, non axuda a Zelenski, mais o éxodo masivo da poboación xuvenil e o malestar coa política do Executivo de Zelenski entre a mocidade non se explican sen a corrupción. Así o entende un dos maiores especialistas no leste de Europa, o xornalista británico Owen Matthews, quen alerta de que "a mocidade está abandonando o país en masa", significando que desde finais de agosto de 2025 "abandonaron o país pola fronteira de Polonia 100.000 persoas" de entre 18 e 22 anos. Matthews, fillo dunha ucraína e moi crítico coa política do Kremlin, considera que "o éxodo de mozos ucraínos podería ser fatal" e que "xera a Zelenski non só un dilema militar, senón tamén político".