Moverse en Palestina

Actualmente, hai máis de 700 obstáculos físicos que restrinxen e controlan a liberdade de movemento en Cisxordania. Algúns deles limitan ou impiden o acceso da poboación palestina a Xerusalén Leste e ao Estado de Israel. Estabelecidos polas forzas de defensa israelís "por cuestións de seguridade", estes obstáculos adoptan diferentes formas: checkpoints (postos de control), comportas, barricadas e muros de terra. 'Checkpoints' permanentes Hoxe en día existen 140 checkpoints con estrutura física permanente. Adoitan ter o aspecto dun control de fronteira e normalmente contan cunha torre de control. Do número total, 64 sempre teñen persoal das forzas de seguridade israelí e localízanse en diferentes puntos: 32 ao longo do muro de separación entre Cisxordania e o Estado de Israel ou nas estradas que conducen a Israel, 20 no interior da cidade de Hebrón e 12 noutras zonas de Cisxordania. De maneira habitual o exército israelí pode decidir fechar un checkpoint durante un tempo indefinido, alterando a circulación e creando conxestión nas estradas. Rita vive nunha aldea da área metropolitana de Ramallah: "Da miña casa á cidade debería tardar un cuarto de hora, pero ás veces lévame tres cuartos de hora ou incluso dúas horas se fechan as estradas. Aínda que forma parte da miña rutina, non é normal atoparme con checkpoints no camiño". Mohamed tamén fala das consecuencias dos postos de control: "A ocupación afecta os meus desprazamentos desde a miña casa á universidade. No traxecto entre Xenín e Ramallah paso por catro controis militares. Ás veces chego unha hora tarde". 'Flying checkpoints' Os controis temporais, sen estrutura física, coñécense co nome de flying checkpoints e consisten no despregamento de soldados israelís durante varias horas nunha estrada específica co fin de parar e controlar os condutores e vehículos palestinos. Ao igual que os checkpoints físicos, este tipo de controis provocan situacións de tensión e atrasos considerábeis ou non poder desprazarse ao lugar desexado. Hassan explica que en 2023 intensificáronse os controis: "O rexistro de vehículos particulares e de pasaxeiros é unha forma de acoso e de control da ocupación". A comezos de ano, en Xericó estiveron illados do resto de Cisxordania durante 10 días no marco dunha operación militar Ademais, os checkpoints permiten illar vilas e cidades durante horas ou incluso días. O caso máis destacado é o de Xericó, cidade que sufriu tres fechamentos no que vai de ano, o máis longo de dez días. Entre o 28 de xaneiro e o 7 de febreiro os habitantes desta cidade situada no Val do Xordán estiveron illados do resto de Cisxordania no marco dunha operación militar. O último fechamento produciuse na última semana de marzo. As estradas do norte do país, que conectan Ramallah con cidades como Nablus, Tulkarem ou Xenín, tamén se ven moi castigadas polos flying checkpoints. 2023 está a ser un ano marcado por numerosas operacións militares no norte, que perseguen a resistencia de Xenín e Nablus. Huwara, lugar de paso para ir ao norte de Cisxordania, xa contaba cun checkpoint permanente, pero os flying checkpoints son habituais desde hai uns meses. 'Checkpoints' no muro de separación O caso dos checkpoints entre Cisxordania e o Estado de Israel é particular. Para que unha persoa palestina poida cruzar un posto de control e acceder a Israel precisa un permiso especial (de traballo, médico, relixioso…). Como o resto de checkpoints físicos, estes tamén poden fechar aleatoriamente, impedindo á poboación palestina a circulación, pero non aos colonos israelís que viven en Cisxordania. Ahmed, estudante na Universidade de Birzeit, fai o camiño entre Xerusalén e Birzeit: "Teño que pasar por postos de control todos os días. Trátannos de maneira inhumana. Moitas veces chego tarde e ás veces nin podo ir ás clases". Ademais de producirse fechamentos por "cuestións de seguridade", o exército tamén fecha os postos de control durante as festividades xudías. Entre o 10 e o 12 de abril, debido á Pascua xudía, a poboación palestina tivo vetado o acceso ao Estado de Israel. Desde o punto de vista económico e laboral, os salarios dos palestinos que viven en Cisxordania pero traballan en Israel vense condicionados. Outros obstáculos físicos Nas entradas principais de determinadas vilas e aldeas palestinas, así como nas estradas de acceso, existen barreiras físicas: barras ou portas metálicas que as forzas israelís poden fechar en calquera momento, deixando os habitantes incomunicados. O exército tamén emprega lousas de formigón ou muros de terra para fechar estradas e camiños. Outros obstáculos físicos, como barricadas e trincheiras tanto temporais como permanentes, impiden aos agricultores o acceso ás súas terras. A presenza de controis militares e de barreiras físicas en estradas, rúas e camiños, condiciona o día a día da cidadanía palestina e ten un claro impacto na súa vida persoal, profesional e académica. A liberdade de circulación e movemento, dereito humano básico, é denegada en Palestina, como tantos outros dereitos que se ven vulnerados pola ocupación israelí.