A vida universitaria en Palestina

Os Acordos de Oslo dividiron Cisxordania en tres áreas administrativas (A, B, C). A Área A (18% do territorio) é administrada pola Autoridade Palestina en materia civil e de seguridade interna. Na Área B (22%) o Goberno palestino só ten competencia civil e as forzas israelís controlan toda a seguridade. A Área C (60%), onde a poboación palestina ten prohibido o acceso, está controlada por completo polo exército israelí. O concello de Birzeit, a 10km da cidade de Ramallah, está dividido entre a Área B e C. Nesta vila atópase a Universidade de Birzeit, unha das máis grandes das 10 universidades en Cisxordania. Inicialmente unha escola primaria feminina, Birzeit converteuse en universidade en 1975 e a día de hoxe conta con máis de 15.000 estudantes. Por tratarse dunha institución cunha marcada conciencia política, está baixo a mirada constante de Israel. O campus universitario, que forma parte da Área B, é escenario de repetidas operacións militares e feches forzados por parte do exército israelí alegando “cuestións de seguridade”. As forzas israelís perseguen e controlan a educación, vulnerando dereitos básicos como a liberdade educativa e a autonomía institucional. Hassan, estudante de Deseño, denuncia “o trato humillante e os métodos de sabotaxe do proceso educativo”. Centos de universitarios palestinos son atacados, detidos e torturados cada ano, sendo o alumnado de Birzeit o máis afectado. O risco de ser arrestada Tanto estudantes pertencentes a organizacións sindicais como alumnado sen afiliación que participa na vida académico-política corren o risco de seren arrestados tanto dentro coma fóra da universidade. As incursións arbitrarias forman parte da estratexia israelí de perseguir o activismo pro-palestino, atentando contra a liberdade fundamental de expresión e asociación. Ahmed, estudante de Informática, explica que “calquera publicación política pode derivar nunha investigación ou arresto, impedindo que os estudantes poidan graduarse”. O seu compañeiro Sami fala do impacto mental da ocupación: “Os seus crimes aféctanme a nivel emocional e contribúen a que diminúa a miña motivación”. Co fin de defender os dereitos dos estudantes, en 1988 fundouse a campaña de protección, solidariedade e concienciación Right to Education Campaign, que documenta, investiga e sensibiliza sobre a opresión dos estudantes baixo a ocupación militar. 80 estudantes permanecen en prisións israelís, algúns baixo detención administrativa, sen cargos nin xuízo A Universidade de Birzeit sufriu máis de 10 feches forzados desde a súa fundación, o máis longo deles durou catro anos, entre 1988 e 1992; e 19 operacións militares, 10 delas na última década. Na tarde do 7 de marzo de 2018, en pleno horario lectivo, cinco axentes encubertos infiltráronse en Birzeit. Omar Al-Kiswani, presidente do Consello Estudantil, foi agredido e arrestado ante o ollar dos seus compañeiros. Posteriormente foi trasladado ao centro de interrogación Moskobiyya en Xerusalén onde, durante varias semanas, foi torturado e sometido a interrogatorios diarios de máis de 20 horas. Omar xa fora arrestado en xuño de 2015 e sentenciado a un ano de prisión e a cinco anos de liberdade condicional. O 14 de decembro de 2021, ás 4.15 da mañá, arredor de 100 soldados israelís invadiron o recinto universitario, atacando con gas lacrimóxeno e detendo varios gardas de seguridade na entrada principal. Os militares asaltaron tres facultades e levaron consigo material informático, ademais de rachar a bandeira palestina izada no centro da universidade. Na tarde do 10 de xaneiro de 2022, durante unha xornada de folga de estudantes, axentes encubertos atacaron nun dos accesos á universidade a un grupo de alumnos que se dirixían a unha reunión do Consello Estudantil. Durante a operación os axentes abriron fogo e arrestaron cinco estudantes, entre eles, o líder sindical Ismail Barghouti, que recibiu un disparo na perna con munición real. Barghouti e o seu compañeiro Mohammad Khatib foron transferidos á prisión israelí de Magiddo. Máis de 2.300 estudantes detidos “Estudamos nun ambiente traumático, conscientes de que un dos nosos compañeiros pode ser asasinado ou acabar en prisión”, denuncia Saba, estudante de Finanzas. Desde 1975, máis de 2.300 alumnos da Universidade de Birzeit foron detidos por causa do seu activismo contra o apartheid israelí, 8 deles no último ano. Ademais, máis de 80 estudantes permanecen en prisións israelís, algúns deles baixo detención administrativa (sen cargos e sen xuízo), sen poderen finalizar os seus estudos. “Baixo a ocupación non podemos soñar nin planear o noso futuro, a nosa vida basease en protexer esta terra e reclamar a nosa humanidade”.