“O dereito a decidir significa afondar na democracia”
Consultas populares e cadeas humanas a prol do dereito a decidir conforman o modo de operacións de Gure Esku Dago, “unha iniciativa cidadá plural e participativa que traballa polo dereito a decidir de Euskal Herria” constituída en 2014. Unai Lizaso fai parte do seu secretariado nacional e viaxou a pasada semana a Galiza para participar nos actos da plataforma Vía Galega en conmemoración do IX Congreso das Nacionalidades Europeas. Eis un extracto da entrevista publicada no número 317 de Sermos Galiza.
Gure Esku Dago nace do camiño que emprendeu no seu día un grupo de Goierri. Reivindicaban o dereito a decidir. De aí xurdiu a idea de facer unha cadea humana que se fixo en 2011 e que percorreu 125 quilómetros. Aí creamos Gure Esku Dago. Coincidiu ademais cunha época de ilusión en Euskal Herria, porque se estaba traballando no cesamento das accións armadas da ETA. E estaba Catalunya, que reivindicaba o dereito a decidir como solución aos problemas políticos. Comezamos coa filosofía de traballar entre distintos e coa idea de que chegou o tempo da cidadanía. Se até agora o protagonismo fora dos partidos políticos, nós dicimos que a cidadanía ten que tomar as rendas.
E iso que supuxo?
Cambiamos as formas. Ás veces acusásenos de ser moi festivos. Mais nós sempre poñemos un sorriso, somos amábeis. E iso trouxo bastante éxito á hora de organizar os eventos. Porque saímos un pouco do habitual, das concentracións e as manifestacións.
Di que é o tempo da cidadanía e, porén, é o Parlamento vasco o que iniciou os traballos para reformar o Estatuto.
É moi importante. Defendemos que os cidadáns collamos as rendas do noso futuro, pero iso non quere dicir que os partidos e as institucións non teñan o seu papel. É xusto o que queremos: que as institucións vaian en consonancia coas reivindicacións da cidadanía. Segundo as enquisas, a maioría da xente de Euskal Herria está a prol do dereito a decidir. E nós cremos que o dereito a decidir significa afondar na democracia e a maneira de solucionar problemas políticos. Na base da ponencia sobre autogoberno está o dereito a decidir. Na última cadea humana, este ano, emprazamos os partidos a que o reflectisen na ponencia. Un mes despois, o PNV, EH Bildu e nalgúns aspectos Podemos, chegaron a un acordo.
[Podes ler a entrevista íntegra no número 317 de Sermos Galiza, á venda na loxa e nos quiosques]