Servizos secretos: de Putin a Mortadelo e Filemón

Todos os países teñen servizos de información ou de intelixencia dos que poucas cousas coñecemos, máis aló do que se conta en longametraxes que falan do Mossad (Israel), da CIA (Estados Unidos), do MI5 ou MI6 (Reino Unido), ou das novelas de John le Carré. No Estado español existe o CNI (Centro Nacional de Intelixencia), creado en 2002, sucesor do CSID (Centro Superior de Intelixencia da Defensa). A misión destes servizos é garantir a seguridade e protección do país, e non sempre con métodos propios dunha democracia. Recentemente en España temos escoitado falar de casos como Pegasus (referido a independentistas cataláns) ou do roubo de información dos móbiles do presidente do Goberno ou da ministra de Defensa. Ou da morte a tiros dun cidadán ruso en Vila Joiosa (Alacant) de nome Maxin Kuzmínov, da que o Goberno pouco coñecía. Sen preguntas Kuzminov era un piloto que desertou nun helicóptero de combate, un Mi-8, a Ucraína, onde o seu presidente, Volodimir Zelenski, o cualificou de heroe e pagoulle con protección. O apoio, ademais de cartos de abondo, tamén levaba novas identidade e nacionalidade. O militar refuxiouse nunha vila tamén elixida pola mafia rusa e os servizos secretos do Kremlin, que o executaron aos sete meses de fuxir. O corpo foi atopado o 13 de febreiro atropelado polo seu propio carro, con varios tiros, no aparcadoiro da súa vivenda. O xefe do Servizo de Intelixencia Exterior (SVR) ruso, Serguéi Narishkin, afirmou que a vítima era "un traidor criminal". O 9 de novembro de 2023, Alejo Vidal-Quadras recibiu dun sicario un tiro na cara no centro de Madrid. O que fora vicepresidente do Parlamento Europeo, militante do PP e fundador de Vox culpou da autoría o réxime de Irán. Son coñecidas as relacións de Vidal-Quadras coa disidencia iraniana que, por certo, financiou as primeiras campañas da organización ultra. A misión dos servizos secretos é garantir a seguridade e protección dun país e non sempre con métodos propios dunha democracia Son casos nos que o Goberno de España non ten pedido explicacións (e algo máis) aos países sospeitosos, o que leva a pensar que estes servizos secretos teñen máis que ver coa axencia TIA (Técnicos de Investigación Aeroterráquea) –en parodia da CIA– creada polo xenial Francisco Ibáñez en 1969, da que formaron parte Mortadelo e Filemón, axentes 'formados' nos servizos de información impulsados pola ditadura franquista, coma os tres exércitos e o Servizo Central de Documentación, dependente de Luis Carrero Blanco para loitar contra a subversión, e que tivo súa herdanza na 'policía patriótica' do comisario Villarejo. Pim, Pam, Pum! Os servizos secretos de intelixencia non son unha brincadeira. A folla de servizos do SVR (Servizo de Intelixencia Exterior), controlado por Vladimir Putin, recolle nun ano máis crimes violentos que unha novela negra nórdica. Alexei Navalni é o derradeiro –polo momento– opositor coñecido que apareceu morto, o 16 de febreiro, nunha cadea do ártico, onde cumpría 19 anos. En agosto de 2020, o disidente xa estivera ás portas da morte por envelenamento. Mesmo xeito aplicado a Serguéi Skripal, axente duplo (do MI6 británico e do GRU ruso) que foi asasinado en 2018 xunto á súa filla Yulia con novichok, na cidade inglesa de Salusbury. A morte de Alexander Litvinenko, espía falecido nun hospital londiniense en 2006, tamén foi envelenado, neste caso con polonio. Nos anos 2000 refuxiouse en Londres, tras negarse a matar a Boris Berezovky, morto en marzo de 2013 en Surrey, sueste de UK. Yevgeny Prigozhin, fundador de Wagner, Exército mercenario ao servizo de Moscova, faleceu nun sinistro aéreo en agosto de 2023, dous meses despois de desafiar a Putin polas diverxencias na guerra de Ucraína. Ravil Maganov faleceu en 2022 ao 'caer' dendunha fiestra dun hospital de Moscú. Era presidente de Lukoil, xigante petroleiro de Rusia. Unha das vítimas máis coñecidas dos servizos de Putin é Anna Politkovskaya, xornalista do Novaya Gazeta, asasinada en outubro de 2006 após denunciar violacións dos dereitos humanos cometidos polo Exército ruso en Chechenia. Un lugar destacado no catálogo represor de Putin ocupa tamén o pim, pam, pum aplicado a Vladimir Golovliov (deputado morto a tiros en 2002, acusado de enriquecemento ilícito nas privatizacións feitas por Moscova), Serguéi Yushenkov (deputado tiroteado en 2003) e Boris Newtson (ex viceprimeiro ministro eliminado en febreiro de 2015). Unha escolma de vítimas da crónica negra dos "efectivos" servizos secretos de Putin quen vén de ameazar o mundo co uso de armas nucleares se a OTAN envía militares a Ucraína.