PSOE e PP alíanse para incrementar o gasto en armamento

O Congreso rexeitou esta quinta feira oporse ao aumento do gasto militar e ao plan de rearmamento da Unión Europea (UE) co voto de PP e PSOE, nunha votación que serviu para demostrar as discrepancias no seo do Goberno de coalición en materia de defensa e seguridade, xa que Sumar votou en contra diso e apoiou que o Estado español abandone a OTAN.

A iniciativa en cuestión, unha moción do BNG que se votou por puntos, incluía dous para rexeitar as "ameazas" do presidente de Estados Unidos, Donald Trump, a Grenlandia e Panamá e o seu plan de "limpeza étnica" para a Faixa de Gaza, que se aprobaron co si das dúas partes do Executivo.

O deputado do BNG no Congreso, Néstor Rego, lamentou que PP e PSOE non apoiasen a oposición á proposta da Comisión Europea de destinar 800.000 millóns de euros á compra de armamento ou a renuncia a incrementar o gasto militar. “A aposta polo rearme detrae recursos de políticas sociais e servizos públicos esenciais para a cidadanía”, denunciou o deputado nacionalista.

O BNG tamén procuraba o apoio do Congreso para instar o Goberno do Estado á saída do Estado español da OTAN e á disolución desta alianza militar, mais a proposta non conseguiu o apoio suficiente. “Seguiremos defendendo a necesidade de superar estruturas belicistas que só serven para alimentar conflitos en lugar de resolvelos”, afirmou Néstor Rego.

Os socios do Goberno tamén se mostraron de acordo en apostar pola vía do diálogo e a negociación para a paz e para propiciar un novo contexto de estabilidade e relacións de boa veciñanza en Europa e no mundo, outro dos tres puntos que saíu adiante.

O PSOE e Sumar mostraron as súas desavinzas ao redor da iniciativa nacionalista xa na terza feira. A formación socialista avanzou o seu apoio a todos os puntos excepto aos relativos ao plan de rearmamento da UE, ao aumento do gasto militar e á saída da OTAN, mentres que Sumar destacou en todo momento a súa sintonía con todo o texto do BNG, sinalando que non lles xeraba conflito votar distinto aos seus socios xa que a iniciativa non é vinculante. Ademais, a formación de Yolanda Díaz garantiu que todo o grupo votaría unido.

Do seu lado, o PP abstívose no relativo ás rexións "ameazadas" polo mandatario estadounidense e na condena aos seus plans para Gaza, mentres que Vox, afín á nova Administración estadounidense, votou en contra de ambas.

Votacións no Congreso

Por outra banda, o Congreso rexeitou unha iniciativa do PP que pedía ao Goberno, entre outras medidas, someter a votación no Congreso as decisións relativas ao gasto militar e á guerra de Ucraína, cos votos en contra de PSOE e Sumar.

Dado que o PNV e Junts abstivéronse, o PP podería sacar adiante a súa iniciativa co apoio de Vox, pero os de Santiago Abascal decantáronse tamén pola abstención en protesta pola negativa dos 'populares' a aceptar as súas emendas.

Así mesmo, a proposición non de lei do PP reclamaba reafirmar o compromiso do Estado español coa integridade territorial e a soberanía de Ucraína; defender a participación da UE e Kiív nas negociacións para acabar coa guerra, reforzar o vínculo transatlántico e cumprir os compromisos da OTAN. O PSOE abriuse a apoiar estes puntos nunha votación separada por puntos, pero finalmente o PP preferiu que se votase en bloque, polo que os socialistas rexeitárona.

Durante o debate da iniciativa, o portavoz estatal do PP, Borja Sémper, cargou contra o Goberno español por carecer "de rumbo e criterio" en materia de seguridade e defensa, destacando as discrepancias no seo do Executivo, inmerso nun "sainete opaco", en asuntos como o gasto militar. "Un Goberno dividido en todas as materias fundamentais, un presidente que só fala por unha banda e sostido por partidos que non cren na UE e na OTAN", dixo o portavoz 'popular'.